Rocky澄清早前舉動為示愛　和崔碧珈了解中未有親密行為

58歲「大隻Rocky」鄭健樂早前因為在社交平台改status和性感女神崔碧珈「戀愛中」而成為熱話，不過之後女方出席活動時就指自己單身，亦不知道Rocky和自己在社交平台「戀愛中」。到今日(17日)凌晨，男主角終於在社交平台出長文解釋事件，指自己「因為自己玩社交網站唔叻」，「改咗同佢嘅戀愛關係」動機為示愛。

崔碧珈雖然亦有大讚Rocky是好男人，不過連日都否認已經戀愛中，亦有回應網民替鄭健樂不值：「會唔會有可能其實我先係受害者，俾人擺上枱博宣傳呢？」而鄭健樂亦終於出長文回應兩人關係。當中先大讚對方：「Anita係一個好勤力認真工作同不停學習求進步嘅好女仔，呢個亦都係我非常欣賞同鍾意佢嘅原因。」
亦提到二人認識不久：我同Anita喺上個禮拜上健身堂先第一次真正見面同認識，同佢上咗兩次堂之後，上個禮拜五晚佢為咗答謝我，佢喺佢自己嘅社交網站post我哋嘅運動合照同埋tag咗我，並且落堂後請我食飯。食飯過程我哋有好好嘅交流，我覺得大家將來係可以發展落去嘅。」

提到轉status，他就指因為想追求及給驚喜對方：「食完飯之後，我哋各自返咗自己屋企。當晚因為我想正式向Anita作出追求同埋俾個驚喜佢，所以係冇事先徵求佢同意之下，就喺自己私人Facebook更改咗同佢嘅戀愛關係。我成個動機其實係希望佢第二日喺屋企瞓醒時，睇到個Facebook通知之後，會感到開心同埋接受我嘅愛意，並且知道我對佢係非常非常認真！」
亦提到不知道會「show到出嚟」：「但係因為自己玩社交網站唔叻，我以為私人嘅Facebook係唔會有其他人睇到，我亦以為更改status，必需對方確認先會show到出嚟。點知原來Anita未確認，個status都會show出嚟喺我個私人Facebook，變咗所有人都睇到。我作為藝人，實在呢件事係自己太大意，令大家作出不必要嘅揣測，變得戲劇化，越描越黑，令Anita飽受負面輿論同壓力，呢個絕對唔係我嘅原意！所以我要為呢件事負上責任，決定出嚟講返成個事實嘅經過。」

最後他和崔碧珈口徑一致：「我只可以講我哋嘅關係，係好好好好朋友。」指二人「仍然處於互相了解當中」，更否認已經發生關係：「亦當然因為大家認識只有一星期，絕未有過任何親密和親暱行為。希望大家俾啲空間我哋，愛護幼苗，如果將來有好消息先會再同大家分享，感謝！」