明星成長｜劉穎鏇半工讀 網課形式修畢美國大學工商管理學士

近來TVB熱播嘅《奪命提示》，其中主要角色之一嘅前港姐亞軍劉穎鏇，今年入行將近10年，演出多部劇集如《兄弟》、《青春不要臉》及《踩過界II》等，除咗擁有優美嘅身材，其實仲係運動健將同美國大學畢業嘅大學生，當年選完港姐後堅持完成大學學位，以網上課程形式上堂，並以半工讀形式完成學士學位，認真叻女！

半工讀完成美國大學學士課程

劉穎鏇自小於美國洛杉磯長大並讀書，高中時加入女子籃球隊，亦參與過不少女子籃球賽，並曾代表球隊參加加州比賽並獲得第二名！大學時入讀加州大學河濱分校工商管理系，後來為咗追夢發展演藝事業而決定停學，回港參加香港小姐競賽，最後更奪得「最上鏡小姐」、「現場最受歡迎佳麗獎」及「2016年度香港小姐競選亞軍」三大獎項，成績非常亮麗。參選港姐後，劉穎鏇決定留港發展，加入TVB成為旗下女藝人，完成藝員訓練班並進行主持、拍劇等工作。

不過為咗圓爸爸媽媽嘅心願，入行後兩年因工作機會穩定，同時見好多同學經已大學畢業，令劉穎鏇決心返回校園，以半工讀嘅形式修讀亞利桑那州立大學工商管理系學士課程，由於能夠網上授課，所以劉穎鏇可於香港邊工作邊讀書，更曾於訪問中講過：「而家科技咁發達，更加冇藉口唔讀書。」最後劉穎鏇亦於兩年前完成為期三年嘅學位課程，正式成為大學生，更排除疫情萬難飛往當地大學與家人一齊影畢業相。

拍完《鐵拳英雄》後感迷失

的確網上授課已經非常流行，時間亦彈性靈活，就好似劉穎鏇修讀嘅呢個課程為例，就連考試都可以透過網上進行。不過雖然方便同時返工嘅人士讀書，不過劉穎鏇曾於訪問中直言要幕前及讀書兩邊走，加上本身都有一定嘅工作壓力，再加埋讀書，過程唔容易。不過劉穎鏇最後都能夠完成學位課程，順利畢業，捱過半工讀嘅艱辛過程。

入行後堅持半工讀

至於演藝事業方面，劉穎鏇嘅演藝發展之路亦非暢通無阻，劉穎鏇入行初時拍劇曾受盡負評，被批評欠缺演技，加上自小於美國長大嘅劉穎鏇較少機會接觸中文，廣東話較差，所以當參與電視節目拍攝時便更加吃力，更透露當時拍完《鐵拳英雄》後，一度未有新劇拍攝，感到迷惘，甚至自我懷疑，而呢個階段亦令劉穎鏇決定重返校園，為自己做好兩手準備。

後來劉穎鏇亦得到唔少嘅演出機會，為咗克服廣東話之弱項，劉穎鏇都經過默默嘅苦練，用自己方法令自己能夠順利完成拍攝，例如將拼音標記於劇本對白上，經過多年磨練，而家嘅廣東話經已大有進步，喺角色上亦都有唔同嘅嘗試，相信繼續努力，演員之路會愈行愈順！

亞利桑那州立大學

亞利桑那州立大學Arizona State University,ASU是一所公立大學，成立於1885年，是美國大學學生數目最多的大學，為學生提供廣泛的學術和課外選擇。亞利桑那州立大學主校區坦佩和鳳凰城地區的其他三個地方為學生提供了300多個大學課程，多達500多個社團和組織。學校還提供給學生超過250個留學選擇。新生必須住學校宿舍，除非是原本住家通勤、已婚或有其他例外。亞利桑那州立大學提供各種的研究生課程，包括W. P. Carey商學院，Sandra Day O’Connor法學院，Ira A. Fulton工程學院和Mary Lou Fulton師範學院。

學費 : HKD$ 65938 / 24周
熱門學科 : 工程、商科、教育
QS排名 : 219位

圖片來源：劉穎鏇IG