花姐豪言「我最喜愛獎等如冇實力」　失言踩自己仔仔捱轟

一手捧香港男團MIRROR出道嘅經理人花姐，平日愛錫MIRROR如親生仔，事無大小都陪伴喺12子身旁，惟近日因為一段花姐以講者身份出席講座節錄片段中，就因花姐疑失言，以致大批MIRROR粉絲「鏡粉」網上怒罵，力斥花姐出言大踩自己「仔仔」，諷刺佢唔好再同MIRROR合作！

片段中，花姐表示：「我成日都同我啲Artist講，你唔好同我講你係偶像派啦，我唔想呀。我甚至同佢講我唔要再攞『我最喜愛乜乜』喇，好戇居，攞『我最喜愛乜乜』咪即係你冇實力，淨係靠人哋投票囉，我唔想係咁呀大佬！」網民認為花姐一竹篙打一船人，將「我最喜愛」定性為「冇實力」，並列出歷年該獎項得主眾多，如張學友、陳奕迅、王菲、Beyond等巨星，反問係咪所有得獎者都係冇實力，街客變成Fans去支持歌手、有觀眾緣都係一種實力。

同時有大批激進鏡粉深深不忿，指摘花姐唔尊重佢自己帶出嚟嘅歌手，尤其MIRROR及其成員姜濤及Anson Lo均多次獲得該獎，佢此言係踩自己「仔仔」，就連其公司名下頒獎禮《CHILL CLUB年度推介》獎項亦係由樂迷投票選出，網民就質疑：「似乎Chill Club都唔適合再舉辦。無謂冠以「冇實力」之名畀眾位歌手。」亦有網友留言諷刺：「其實MIRROR都拎過好多年『我最喜愛組合』，咁即係MIRROR都係無實力？我未見過一個經理人係會同啲hatets 相同口吻，去踩自己啲Artist係無實力」、「呢個經理人，究竟要傷害自己artist到幾時？」、「花姐帶頭踩仔喎😂呢位經理人真係世一🤣」，更有網友「勸」花姐唔好再同「冇實力藝人」合作，意指叫佢唔好再做MIRROR經理人。

東網網站 : https://on.cc/東網Facebook專頁 : https://www.facebook.com/onccnews/