女神配對計劃｜羅毓儀名偵探上身 連珠發炮「審問」林俊其

無綫戀愛綜藝真人騷《女神配對計劃》，昨（6日）晚播出第5集，本集與組員「三角枱約會」的女神，有李芷晴（Stephanie）及羅毓儀（Yuki）。

昨晚一集Yuki三角飯枱的亮點，落在「王浩信2.0」林俊其身上！製作組為Yuki三位男組員—「王浩信2.0」林俊其（Kris）、電台DJ海淦清（T.Max）及醫美太子爺陳衍丞（Kenneth）設計的關鍵字回合考驗為「口味」、「音樂」及「心動」。

等足6年才鼓起勇氣追求女神Yuki的Kris，在「口味」回合中，因Yuki最後選了與Kris同分的Kenneth，Kris最後眼睜睜望著心儀女神跟別的異性有說有笑。

之後到「音樂」題，3位組員需要從3個由不同藝人獻唱的《完璧》中、挑中Yuki主唱哪一首，由於難度系數頗高，Kris一來便崩潰：「死喇！我點算呢？我都驚成餐飯冇得對住佢食！」Yuki亦事先張揚看好T.Max！最終3位組員答錯，要由Yuki挑選第二回合食飯人選！

由於Yuki事前曾講明對T.Max有期望，加上第一回合「有前科」，Kris擔心自己再次不被選中，全程失魂落魄！最終幾經掙扎，Yuki選了Kris飲湯，並坦言對自覺志同道合的T.Max「太失望」。

雖然Kris勝出回合，但似乎仍贏不了Yuki信任，對於認識多年Kris才展開追求，Yuki大感疑惑，飲湯期間一再向Kris提出問題，每條都問得相當認真。Yuki單刀直入問Kris參加《女神配對計劃》，是否為了博出鏡，Kris聞言面帶失落回應：「即係如果我私底下要同你（表白），我覺得好難，我唔會打開到呢個隔膜，（我）突然間話搵你，你都覺得奇怪啦，跟住突然間話有個咁嘅機會（指《女神》），冇諗過就真係直接過咗嚟，講真，呢個都算係攞正牌（追你）呀。」

Yuki對Kris答案未滿意，再追問謂：「但之後你又冇特別做啲咩喎？」，Kris說：「平時我個人唔係好主動，加上大家同事，可能我自己會有個膜喺度，所以係咯，斷斷續續咁樣。」Yuki再問：「你嗰時有同我哋（Yuki與其前度）拍過Youtube，咁你係咩心情？」Kris說：「我啱啱咪話我斷斷續續嘅，因為我知你嗰時有伴侶吖嘛。」

Kris海選時表現得「好似好了解自己咁」，Yuki當刻一度感動至哭成淚人，成為一時佳話；但經過一輪「消化」後，Yuki覺得有疑點：「我覺得好奇怪呀，我同你唔係好多接觸，但你講好多嘢都好中，我即刻好陰謀論咁諗，係咪Arthur（施焯日）或者Peter（陳嘉俊）通水。」

Kris聽畢也坦承「追求」Yuki前，有向Yuki閨密取經：「平時你講嘢，我都大概知你係咩人嘅，但係我都想問人confirm，就問咗你老友阿菲（王菲）。」

（即時娛樂）