52歲貼地CEO林文龍街坊裝食魚蛋粉 為搞好亞視推幕前工作

無綫劇《法證先鋒IV》大收，終於播完大結局，尾集小丑再度出現，原來係呼應上一輯嘅石灘發現小丑屍體案，立即令網民緬懷過去幾輯大卡士嘅《法證》，而喺第二輯拍住歐陽震華嘅林文龍，更加成為大家嘅集體回憶。依家貴為CEO嘅林文龍，為專心做好亞視副總裁呢份新工，已經推晒所有幕前工作，幫無綫拍嘅《那些我愛過的人》更因為佢嘅新身份而播映無期。

原文刊於《東方新地》

林文龍做貼地CEO 街坊裝落九龍城食魚蛋粉

雖然升呢做副總裁，不過林文龍未有變得高高在上，工作以外繼續人夫人父之日常，早排見佢單拖揸車到九龍城買魚蛋，入到去熟晒架步，又同店員好熟絡，就知佢係熟客仔，呢間魚蛋粉麵店喺嗰區係老字號，假日成日排晒長龍買魚蛋，林文龍真係識食，買完就揸車返西貢匡湖居寓所。

忙於幫亞視重組宣布在大馬興建亞洲影視城

唔好以為林文龍去買魚蛋就好得閒，事實上係忙到爆，今年一月上任後立即將亞視大重組以及大裝修，最近仲以亞視副總裁身份帶住班新亞姐去咗馬來西亞，出席喺吉隆坡舉行嘅「亞洲心動娛樂APP」發布會，席間林文龍更宣布喺大馬興建亞洲影視城，真係有排佢忙呀！

林文龍做亞視娛樂大亨！ 召集上世紀「師奶殺手」埋班

娛樂圈冇永遠的朋友，亦冇永遠的敵人，同無綫合作無間的林文龍，繼4K劇《不懂撒嬌的女人》及中港合拍劇《再創世紀》演出備受好評， 未出街新劇還有《那些我愛過的人》， 以為他做硬無綫人，咁就錯喇！近日林文龍轉投亞視擔任副總裁一職，唔做演員做管理層，幫亞視革新重振雄風向無綫挑機，上場即大展拳腳，除得老婆郭可盈出山撐任亞姐評審，近日又造福社會，代亞視宣布向港人派發二十萬口罩齊心抗疫，又捐千萬到武漢支援，原來還有更大Project 進行中。圈中老友多多的他，近日密斟昔日一班師奶殺手歐陽震華、陶大宇、羅嘉良及吳啟華埋班拍劇，滿腹密計勢做娛樂大亨！

林文龍獲老婆大力支持 殺入亞視做管理層

1987年參加無綫超級新星選舉入行的林文龍，近年以外援身份幫無綫拍劇，16年回巢無綫拍4K劇《不懂撒嬌的女人》，之後再有中港合拍劇《再創世紀》，以及仍未出街的《那些我愛過的人》，套套皆大製作，成為無綫王牌外援，不過，月前林文龍忽然倒戈加入亞視擔任副總裁，由演員搖身一變成為管理層身份，滿肚密計大展拳腳，踏入事業新里程。據知情者透露：「文龍喺娛樂圈三十 年，已經係一線小生，做演員去到一個樽頸位，舊年亞視主席賴彩雲搵佢過檔，並唔係做演員咁簡單，而係搵佢入管理層，做亞視副總裁，直接幫亞視改革重整旗鼓，對未試過做管理層嘅文龍嚟講，的確係一個新挑戰，賴主席好盛意拳拳搵佢，對文龍喺圈中人脈同經驗好有信心，仲答應畀好大自由度佢去發揮，佢考慮咗一段時間，覺得自己都係時候去改變一下規律嘅人生，加上老婆大力支持佢嘗試，覺得難得有呢個機會應該去把握，支持老公用心做一定可以做到成績！」

自組新班底 召集上世紀「師奶殺手」埋班

一月已正式上場任亞視副總裁的林文龍，不停有大搞作，除了將亞視大埔總台大裝修，月初在新春團拜更透露會派發廿萬口罩給香港市民，又捐贈千萬支持武漢抗疫，不過，要幫亞視收復失地，自家製作先係王道，現正為公司重整架構及自組新班底的他，近日更密斟昔日一班師奶殺手埋班拍劇。據知情者透露：「加入亞視之後，文龍會參與管理及製作決策，話晒有競爭先有進步，佢做嘢冇顧慮，嚟緊亞視會開劇，佢都唔想馬虎了事，閉關度橋之餘，仲部署挖角，文龍圈中朋友唔少，呢排佢都碌盡人情卡，搵唔少舊拍檔同以前合作嘅同事傾大計，有幕後班底，仲有重量級演員，當中佢就傾緊以前班師奶殺手加盟，好似同佢合作最多最老友嘅歐陽震華、又有以前同老婆拍過唔少劇嘅陶大宇、羅嘉良，吳啟華，個個都好有份量。雖然啱啱上場，但佢已經瞓晒身，都係為咗想畀多啲驚喜觀眾！」 由演員升呢成為副CEO的林文龍，2020年相信是他人生重要一頁！

記者直擊 林文龍：「係接觸好多舊拍檔」

記：「上任之後係咪有好多大計？」
林：「現階段會一步步嚟，要砌好基本班底先，我本身要求高，唔一定咁得心應手搵到我想要嘅人，都要慢慢去見，新任主席畀咗好大嘅自由度我，只要我覺得啱嘅就去做，啲錢應使就使，既然佢咁信任我，我更加要認真去做。」

記：「會否爭取入番電視平台？」
林：「現階段唔會，暫時都係做網嘅嘢，同現階段 投資者嘅方向脗合嘅，都係朝著呢方面做！」

記：「今年會唔會製作劇集？」
林：「一定會。」

記：「係咪會挖角？」
林：「記者會之後，有好多工種嘅人主動聯絡我，包括一啲TVB嘅舊同事，佢哋都話依家一啲新嘅約，Artists 係可以去隔籬台工作，咁我哋係一個網台，變咗同一貫TVB落地電視台唔一樣，競爭唔係咁直接！同埋我自己角度睇，我希望可以做到百花齊放，大家互相幫助互相扶持。所以我覺得如果TVB可以 open，打開門畀Artists過嚟拍我會無任歡迎。」

記：「有指你會搵番以前班師奶殺手合作？」
林：「依家都未有一定方案，不過我呢兩個禮拜係接觸好多舊拍檔同舊同事，不斷見佢哋，睇吓嚟緊會唔會合作到！」

林文龍目標！「帥奶殺手聯盟」挖角名單：

無綫出品過不少神劇，當中成功捧紅不少師奶殺手， 歐陽震華、陶大宇、吳啟華及羅嘉良經典演出令觀眾難忘。

59歲歐陽震華《壹號皇庭》

92年被監製鄧特希睇中，歐陽震華在《壹號皇庭》擔演律師角色，除了演活專業律師，演出更生鬼搞笑，成功奠定師奶殺手形象，連拍五輯《皇庭》系列，事業上位。

57歲羅嘉良《創世紀》

《創世紀》上下兩輯合共106集，是電視史上龐大心力經典作，羅嘉良演的葉榮添，創造無煙城的發跡經過，更成為唔少觀眾追捧的精神偶像，將羅嘉良事業推上巔峰。

56歲陶大宇 《 刑事偵緝檔案》

提到陶大宇事業高峰代表作，大家一定記得《刑事偵緝檔案》，由他演出的張大勇與郭可盈演的高婕（ Jessie ），二 人更因此成為觀眾眼中的金童玉女。

55歲吳啟華 《妙手仁心》

當年經常被定型做奸角的吳啟華，憑著《妙手仁心》一洗壞人形象，他演出的不覊情聖、善良溫柔的腦科醫生程至美，俘虜唔少師奶的心。