政Whats噏：董建華敷衍落實一國兩制　Hea做特首種禍根

前特首董建華任內爆發50萬人上街，加上經濟跌至谷底，實有Hea做同敷衍落實一國兩制之嫌，難怪佢當年會民望插水，要求佢下台嘅聲音此起彼落。不過，呢個喺14年前因腳痛落台嘅首任特首，竟然為回歸以來民望最低嘅特首林鄭月娥護短，到底知唔知醜？

近日香港政局混亂，連莊嚴嘅立法會大樓都可以遭受示威者嚴重破壞變得滿目瘡痍，而政府近期就修訂《逃犯條例》又多番「跪低」，唔同政府部門先後遭到示威者佔領同圍堵，遊行集會更爆發激烈衝突，令各界都質疑政府已淪為「跛腳鴨」，政府權威可謂徹底摧毀。雖然坊間對現屆政府不滿，但董建華作為回歸以來唯一一名任內辭職嘅特首就有另類睇法，唔知係咪因為同情心作怪而選擇護短喇！

董建華今日(3日)選擇性地與部分傳媒高層閉門會面，據報道指佢為林鄭月娥護航，認為林鄭已經承認有不足同道歉，相信之後會做好工作，仲明言換特首解決唔到問題喎。既然換特首無助解決困局，咁點解佢當年又要腳痛落台呢？呢番說話出自董建華之口真係零說服力囉！

據報，董建華喺會面中都承認，任內推行嘅通識教育係導致青年人出問題嘅重要原因，形容通識教育係失敗。雖然肯認衰，但已經恨錯難翻，事關通識科點止一次被指係大型社會運動嘅根源，過往連立法會議員都猛烈抨擊，認為要改革通識科，避免老師有機會宣揚偏頗主張。而2012年嘅反國教風波、2014年為時79日嘅違法佔領行動，都有政界人士歸咎於通識科，計落今時今日嘅亂局，都係因董建華當日種下禍根而起。

作為特首理應要維護一國兩制，但董建華任內7年可謂Hea做，只顧家族生意，雖然一度陷入破產邊緣，但前年決定甩手賣畀中資，過往已被質疑靠「一國」而搵國家着數，「兩制」方面亦敷衍了事。

其實董建華任內都係劣績斑斑，1997年甫上任就宣布興建8.5萬個住宅單位，但冇耐即遇上金融風暴，樓市應聲下跌，出現大批負資產業主，港人已累積一定怨氣，及至2003年爆發沙士，加上政治上激發50萬人上街，最終痛腳下台，依家佢竟然開腔幫林鄭月娥，真係唔知會否變死亡之吻！

東網網站 : https://on.cc/

東網Facebook專頁 : https://www.facebook.com/onccnews/