我哋全部都係星！

今季《全民造星》爆紅，放假無乜節目，走在潮流尖啄嘅你哋應該唔會唔睇啩？

都係選秀節目姐，🎤點解《全民造星》會引起咁大迴響，成為我哋茶餘飯後的話題，甚至連友台力捧嘅歌手/演員都忍唔住要觀摩一下，🎬撘兩句咀？除咗因為參賽者夠gimmick、花姐夠mean、主持夠醒目、導師夠料、評判夠話題性之外，可能係因為成個節目夠貼地！

🌟貼住個地都可以追夢🌟

造星製作團隊同參賽者來自五湖四海，花姐好精警咁用兩個字講曬—「騎呢」！有人活喺粉紅色嘅世界，有人喺養家活兒同追夢嘅夾縫之間掙扎，有人憑天賦樣子/聲音/演技/性格爆發小宇宙，有人自覺天資不足似隻牛🐂咁硬淨勤力，有人失去自信迷失方向，有人載浮載沉走到樽頸尋求突破，🎭有人屢戰屢敗又屢敗屢戰，有人幕前走到幕後再返番幕前(哈哈~估下講緊邊個？)⋯⋯

就連花姐都有段感人辛酸嘅奮鬥史，仲有Stephy由「鄧走音」變評判！現實，本來就係咁殘酷，十隻手指係絕對有長短嘅，總會有人條起跑線前過自己，人都係會偏心㗎喇。懶公平？阿芝話齋：「唔好啦！」

唔公平又如何？造星班底話我哋知，只要你個心未死，團火未熄，心口有個勇字，唔理你係男係女👨🏻👩🏻，係老係嫩👨🏻‍🦳👶🏻，係mirror定係error，都有好多唔同嘅可能性，繼續追尋屬於你嘅嗰個夢！

🌟貼住個地都可以爆發極限🌟

追夢之外，《全民造星》另一個賣點就係花姐、導師同評判點mean人(你唔鐘意睇？你~呃~人~)。雖然有時都會忍唔住戥啲參賽者唔抵，覺得佢哋陰功，之但係經驗老到嘅花姐、導師同評判又的確句句到肉，字字鏗鏘嘅。更加令人佩服嘅係參賽者嘅慧根同埋反彈能力，比人mean完仲要極速收拾心情，調整心態，追上排練進度，甚至推倒重來，仲要愈戰愈勇，真係一啲都唔簡單！人生，本來就係咁唔容易㗎喇，努力咗唔代表唔洗比人鬧，用心咗唔代表人哋一定會欣賞，頹廢緊唔代表啲嘢唔洗做。順風順水？唔會啦！

唔係順風順水又如何？造星班底親身示範比我哋睇「人總需要勇敢生存」。只要我哋仲生存，就咩事都有可能！可能我哋會突然「叮」一聲開竅，由谷底反彈，爆發潛能同極限呢！

🌟全民造就希望🌟

所以呢，《全民造星》又點只係選秀造星，佢係造就緊我哋對夢想、對人生嘅一份希望。講到希望，又點可以唔請大師贈我哋兩句！Prof. Charles Richard Snyder同研究團隊喺九十年代提出咗希望理論(Hope Theory)，佢哋認為希望其實係一個朝住目標努力嘅狀態。而一個人有幾咁有希望，就取決於三個因素：

🎯目標(goals)：個目標對我哋嚟講有幾咁重要/有價值

🛤途徑 (pathways)：我哋唧到幾多空間、時間同精力捐窿捐罅，搵唔同嘅途徑去達成目標。

🏃🏻行動力(agency)：我哋有幾願意踏出第一步，去嘗試呢啲唔同嘅途徑，同埋喺遇到挑戰嘅時候有幾有毅力堅持落去。

大師仲話呢份希望唔一定係喺風和日麗、鳥語花香嘅時候出現；而係喺天色昏暗、風雨飄搖嘅時候比我哋一點曙光、一個方向。就好似每個人有一條自己嘅專屬彩虹🌈咁，出唔出現，某程度上都由我哋自己話事！

或者今季《全民造星》出現嘅時間啱啱好，刺激我哋喺艱難嘅日子反思一下人生目標，比我哋睇到更多喺生活嘅夾縫之中為目標掙扎嘅可能性，亦都增加咗我哋作出嘗試同堅持嘅動力！

新嘅一年又到喇！2021你又有咩希望？

想知多啲，可以睇吓呢篇文：
Snyder, C. R. (2002). Hope theory: Rainbows in the mind. Psychological inquiry, 13(4), 249-275. Sent from my iPhone