彭皓鋒成功將腫瘤縮細一半　積蓄已經「使凸」仲要還債

藝人彭皓鋒下午接受新城廣播節目訪問。身患癌症的他透露目前經友人介紹下，服用口服幹細胞，成功將腫瘤縮細一半：「依家身體OK嘅，相當樂觀，不過未完全好番，所以冇諗過公開介紹藥物。每個月嘅藥費支出起碼兩至三萬，為我嚟講係沉重嘅負擔，所以依家可以就努力搵錢，好似早排我就喺內地西雙版納拍咗個網劇，今次仲有機會演好人添。」

他又坦言早前有年多休息未有工作，積蓄已經「使凸」要還債：「依家趁體力可以，就搵多啲agent幫手接嘢做，嚟緊我都會去湛江同馬來西亞做嘢。」外傳他要眾籌30萬醫藥費，彭皓鋒連聲否認：「冇咁嘅事，相信係好耐之前講過要做手術嘅話，起碼要30萬啫，咁我依家都冇諗住做手術，驚傷身呀，癌症最緊要係唔好擴散，同埋腫瘤唔好變大，依家我兩樣都冇，所以未有考慮住。」

東網網站 : https://on.cc/東網Facebook專頁 : https://www.facebook.com/onccnews/