Ray Online｜黃鳳嫺卸任消委會總幹事後任電台主持 分享離任願望是在家睡足3日
任職消委會總幹事12年嘅黃鳳嫺5月初約滿離任，話咁快迎嚟新工作，會擔任電台節目嘉賓主持，第一集會分享離任後第一大挑戰，就係「斷捨離」。
黃鳳嫺下星期一(7月14日)起會擔任雷霆881《自家女皇》新一季嘉賓主持，以女性角度同自身經驗，分享生活點滴，繼續貫徹精明嘅消費理念。根據電台介紹，黃鳳嫺喺第一集會分享離任後嘅第一大挑戰，將辦公室同家居物品進行一次「斷捨離」。貫徹住精明性格，黃鳳嫺仲好認真咁上網睇「雞精短片」，學習點樣有效「斷捨離」。佢笑言：「我係一個好整齊嘅人，面對咁多箱嘢，就要諗一個好好嘅策略。」
至於「斷捨離」第二個重點，黃鳳嫺話要令自己有滿足感，所以首先挑戰書櫃：「我會取易捨難，因為書櫃係最容易，一眼睇晒，邊啲書可以犠牲，想留嘅書又再放返上去，然後好整齊咁，就好有滿足感！」佢犠牲咗細個鍾意嘅英文偵探小說，不過保留咗成套金庸系列。黃鳳嫺更加透露係唐老鴨同黛絲嘅超級粉絲，毛公仔同相關收藏品裝滿大約10個紙皮箱，仲有《龍貓》嘅大卷次子都是摰愛之一。
離任願望是在家睡足3日
習慣面對鏡頭嘅黃鳳嫺，今次初嘗擔任電台節目主持，佢話：「做清談節目比做嚴肅訪問輕鬆得多，但都要預先構思內容，能夠同公眾共鳴嘅地方。」除咗「斷捨離」，黃鳳嫺喺大氣電波公告天下，婉拒所有朋友約會，因為要實踐離任後嘅一大願望：「我已經立定決心，8月1號至3號，喺屋企瞓足3日3夜。」
睇完新聞，記得追蹤am730以下平台，接收最新、最啱你嘅消息！
Facebook：am730 (https://www.facebook.com/am730hk)
Instagram：am730hk (https://www.instagram.com/am730hk/)
YouTube：am730 (https://www.youtube.com/c/am730video)