90年代艷星飽受病魔折騰　丁母憂傷心欲絕：剩我一個人

90年代艷星鄭艷麗淡出幕前多年，近年飽受病魔困擾，近日在社交平台透露母親最近一、兩個月多度出入醫院，日前不幸離世，鄭艷麗難過表示：「希望媽咪一路好走會放心我」。鄭艷麗於上載母親的單人照片，表示：「想同大家講一件事，媽咪喺呢一兩個月一直喺醫院出出入入，今日終於走咗啦！真係好突然嚟得太快啦！好難接受到，而家剩返我一個人，幸好有好多朋友同埋媽咪嘅親戚一直都關心我陪伴我幫我，好感恩有佢哋嘅幫忙陪伴。我知道嚟緊嘅路係好難行，我會盡力去努力去行，希望媽咪一路好走會放心我，我會永遠掛住佢，愛佢，媽咪一直會放在喺我心裏面，媽咪會陪伴我一齊行落去嘅。」

鄭艷麗參加《1988銀河接力大賽》奪得女主角組冠軍而入行，在TVB發展約三年後轉投電影圈，拍過不少艷情片一炮而紅。其後到台灣發展，並與已故商人黃任中過從甚密。早年她患上厭食症，體重曾暴跌至90多磅，更曾入住醫院深切治療部（ICU）。鄭艷麗淡出幕前後曾任職快餐店員工，又做過清潔工人，惟近年健康欠佳，多次出入醫院，而遭公司開除，需要頻頻轉工。

東網網站 : https://on.cc/東網Facebook專頁 : https://www.facebook.com/onccnews/