林子善被指曾對食客無禮　「冇發生過，吹得就吹」

日前有網民以「不如講吓你遇過最無禮貌嘅藝人嘅經歷」在Threads發帖，吸引不少人留言參與討論，其中有人提到林子善曾在自家冰室對食客無禮，林子善親自回覆，直言「從來唔會對客人咁冇禮貌」，又表示「根本都冇發生過，吹得就吹」。

有網民指曾幫襯林子善開設的冰室，但卻被無禮對待。該網民寫道：「林子善之前同人夾左（咗）間龍鳳冰室，嗌左（咗）個茶餐，無味。揮手嗌佢埋嚟，客氣同佢講：林生，個米粉無乜味喎！佢話：係咁架啦，唔岩（啱）食咪下次唔好嚟囉。Ok 最後間野（嘢）執左（咗），唔意外。」

林子善就帖文親自回應：「我從來唔會對客人咁冇禮貌！遇到呢啲情況我通常，會同客人講聲唔好意思，我幫你cut咗佢，需唔需要換過第二啲食物，從來我唔會解釋咁多，用禮貌嘅態度，聆聽客人嘅需要，用最快嘅速度安排返，因為我淨係知道一樣嘢，顧客食得開心佢會返嚟，食得唔開心，你唔收佢錢佢都唔會再返，所以我一向對客人，應對禮貌安排細心效率快，所以我一睇必定唔係我處事嘅方式，以前有啲客話我杯奶茶唔夠熱，我都唔解釋咁多，直接車走，換過杯新嘅俾佢！但佢冇自己諗過自己坐咗成10幾分鐘喺度玩電話，但我哋都唔會得失客人，一杯奶茶幾多錢？但一個客人係好寶貴，每一個客人係自己用心去儲返嚟，從小到大我都明白呢個道理！我唔係話要解釋啲乜嘢，而係，有錯我一定會認，但呢啲無理指控我真係接受唔到，因為我從來唔係啲咁嘅人」

林子善另外亦寫道：「喺度睇咗咁多留言！關於我嘅真係得啖笑，唔係想得失大家，而係有網民想俾我知道有人講緊我add咗我入嚟，對我一啲指控真心，我一向做人都係禮貌待人行先，睇過啲事根本都冇發生過，吹得就吹，有陣時做人唔好咁啦，真心對我一啲傷害都冇，但如果做呢啲事令到你可以舒緩吓嘅絕對冇問題，作為一個公眾人物都係娛樂下大家，但可以睇到呢啲人絕對冇接觸過我，認識我嘅人，知道我對人一向都有禮貌有家教，新聞嘅嘢有陣時我哋自己都費事越描越黑，所以不作解釋，好多都係標題黨，祝大家生活愉快，其他嘅嘢唔再一一回復了」。