僱主發現姐姐奇招煮麵嚇破膽！ 原來呢個煮麵法印尼真係有人用

有港媽讀者早前睇廚房cam時無意中發現，家中印尼姐姐原來一直用緊一個聞所未聞的「懶人煮麵法」日常煮麵俾佢哋一家食，嚇到佢傻！

呢位港媽平時會叫姐姐煮下麵，姐姐自己食印尼撈麵，水餃魚蛋等等嘅餸就大家一齊share。港媽一路以為姐姐包撈麵自己煮開，原來佢為咗方便快捷，事後只需要洗一個煲，又費事同僱主嘅麵撈埋一齊，就將佢包撈麵原包連包裝袋，同僱主嘅食物放入同一煲熱水度一齊煮，煮好佢包麵倒出嚟加熱水同味粉就食得，真正一鑊熟。不過佢就方便，港媽知道真相就嚇到面無血色！

咁樣煮個包裝袋會釋放好多塑膠入面的有害化學物質，長期食落肚後果不敢想像。港媽指家中有2歲幼兒，「都唔知食咗幾多塑料毒物落肚」，好彩總算及早發現真相，已經立即禁止姐姐再「自殺式」煮麵。

港媽翻查過到底印尼係咪流行咁樣煮麵，發現原來印尼曾經有小攤販咁樣將原包印尼撈麵同肉丸一齊煲，俾網民拍低兼放上Twitter。其實懶人煮麵法坊間有好多，例如韓國人會將即食麵包裝袋口翻開，直接倒熱水入袋淥麵，但原個連包裝烚就未免太有創意了。

你哋家中的姐姐又有冇佢哋獨門又驚心嘅煮食秘技？大家不妨分享一下～