香港男團重生？天堂鳥操肌重返樂壇

有說MIRROR重燃香港的偶像熱潮，男團更終於被看高一線。

2014年以出道作《登陸太陽》帶出另類MK Pop的三人男子組合BOP（天堂鳥），因為與前公司的合約糾紛而闊別香港樂壇。最近他們簽約新公司重新出發，仲為拍攝出浴鏡頭特登操肌，無論大家覺得係好笑還是好睇，都希望記得這隊香港男子組合。

天堂鳥特別揀選抒情慢歌〈故作瀟灑〉作為回歸樂壇的首支主打歌。

在離開香港樂壇的年多時間，BOP其實一直作出不同的嘗試，除了推出國語歌打入內地市場外，亦有參與多部電影的演出。而三位成員葉灝基（Gordon）、許俊豪（Lincoln）及歐鎮源（Tyrese）為了讓樂迷有耳目一新的感覺，特別揀選抒情慢歌〈故作瀟灑〉作為回歸樂壇的首支主打歌。日前拍攝MV時， Tyrese更獲隊友Gordon及Lincoln推舉，肩負拍攝出浴鏡頭，回饋樂迷。

BOP的電影未上映，樂迷可以在新歌〈故作瀟灑〉中看到三子的演技，此曲講述主角與女友分手後念念不忘，雖然仍然深愛對方，但卻要表現得灑脫，放得開，導演為了將主人翁的心情具體化，特別為BOP安排三位女生，於MV中扮演他們的女友，之間更有大量互動，好似Gordon有孭起女友的畫面，Lincoln則要邊玩層層疊邊冧女，至於Tyrese更要與女友上演床戲：在床上親暱地selfie。

Lincoln指導演給予很大的發揮空間，所以也考起了他的演技，他說：「因為我要同女友玩層層疊，要諗點樣可以演得sweet啲、多啲互動，但因為係第一次見，對方唔多出聲，場面有啲尷尬。後來同導演提議拖手、掩臉呢啲戲份，令到氣氛都變得輕鬆，結果拍攝時間亦係三個之中最快。」至於Gordon則自爆甜蜜背後原來有啲「惡啃」，他說：「我要同女友煮嘢食兼互餵，但實在唔知俾乜嘢反應，更重要係食嘅粟米片冇落奶，要齋啃，但又要表現得好sweet，搞到我好尷尬，面都紅埋。」

至於單身了一段日子的Tyrese則靦腆表示：「好似好耐冇接觸異性，所以拍攝過程中都有啲怕醜，因為要喺床上影相，又要哄瞓覺，但都是帶出感覺嘅畫面。」除了床戲，Tyrese更有出浴鏡頭，他續道：「由籌備到正式拍攝期間只有兩個星期，而導演構思時覺得如果有出浴鏡頭效果會好啲，Gordon同Lincoln聽到後推我出嚟，但在短短兩星期內我實在減唔切肚腩，好在導演話影唔到肚腩，我都可以安心啲！」話雖如此，Tyrese在埋位前也不敢怠慢，狂做掌上壓，務求展示最佳身段。

雖然已轉投新公司天盟娛樂，但外界仍很關心BOP跟前公司的合約糾紛，對此BOP表示事情已告一段落，他們將會重新出發。Gordon說：「合約糾紛已經和解咗，已經係過咗去嘅嘢。我哋BOP一心一意為香港嘅樂壇出一分力，多唔敢講，但我哋會用盡我哋嘅力量。無論大家覺得係好笑還是好睇，希望大家覺得BOP有一個娛樂性，因為喺娛樂圈，娛樂性先係最緊要，最緊要感受到我哋份真，真係好想話俾大家聽我哋係一隊香港嘅組合，亦係一隊好俾心機去為香港樂壇出少少力嘅一分子。我哋會努力工作，等大家知道我哋唔係玩玩下。」

Text：機