雷頌德爆跟老友創作過程曾嗌交 偕黎明蒲韓國夜店搵靈感

雷頌德（Mark）近日由英國返港，擔任陳慧琳（Kelly）演唱會音樂總監，同時應梁兆輝（Brian）的邀請，接受新城《One Music Corner壹角樂》訪問；Mark在千禧年代與黎明和Kelly合作，帶領港式電音熱潮，他受訪時大爆曾與黎明因創作問題吵架，黎明更帶他到韓國夜店取經，回港後炮製出多首勁hit跳舞音樂。

Mark於2018年與妻兒移英，他透露當時在港壓力甚大，他說：「我好需要有自己空間，走嗰時擺到明我要退休，或者我唔要之前壓力，真係好大壓力，辛苦得好緊要，如果留喺香港，我繼續會有壓力，冇得話做少啲，因為我唔係好叻推job，尤其係自己老友。」

雖然近年一直有做音樂，但Mark只能接受沒壓力工作，他稱早前Kelly和BIG FOUR邀請他寫歌，要對方給予充足時間，「佢哋要等得，同埋唔係市儈，要畀得起錢，因為稅又高，做親咩都抽咗一大截，咁冇意思，我做咗好似好無謂咁；我唔知𠵱家香港做一首歌咩價錢，總之我就set一個覺得舒服嘅價。」

Mark亦不喜歡別人干擾他的創作，「我唔係話唔改動，以前做歌好多人好多意見，唔好搞我，我好憎，你信得我係個監製或音樂人，你就信晒我。」

2000年，Mark與黎明製作專輯《北京站》，收錄以電子音樂舞曲為主，成為當年熱門港式電音舞曲之一。Mark透露當時製作過程曾碰釘，「我寫咗一批歌畀佢（黎明），佢聽完話唔鍾意，話呢啲唔係屬於亞洲跳舞音樂，我有拗過，同佢嗌交，佢話『我下個星期去韓國做嘢，你跟我去，帶你去蒲7日』，佢好熟韓國，去feel吓咩歌啲人會出去跳舞，呢7日我摸到一啲嘢，就係亞洲人嘅情緒發泄，同外國人好唔同。」

Mark的事業起點是跟黃霑做配樂，他從霑叔身上學到如何做一位君子。「我學到作為一個創作人或藝人，首先要對人公平，呢個好重要，佢對我好公平，當時仲係小朋友，佢畀個機會我做電影配樂，我負責寫melody，人工每人一半；同埋出埋我個名，永遠都係出黃霑、雷頌德，見人都讚我『呢個後生仔好勁，係未來嘅顧嘉煇』，畀足面、畀足錢，好君子。」Mark指霑叔永遠只會讚人，不會彈人，「佢唔鍾意咪唔出聲囉，但佢讚得一定係真心，只會扶起人，唔會踩低人。」

（即時娛樂）