卡塔爾特集：球迷村五臟俱全Abbound沙灘睇日落

卡塔爾世界盃日記 倒數2日

今天離開AirBnB舊房，前往球迷村check in。呢個球迷村喺市中心南面嘅Free Zone地區，我哋將會喺度逗留19日咁耐。所謂球迷村，其實係喺沙漠上擺滿晒啲貨櫃屋，有成6000間，裡面有冷氣、獨立廁所、衣櫃等，雖然唔大，都叫五臟俱全。

話明球迷村，梗係有波睇，一片大空地放滿咗豆豆疏化，前面係個大銀幕，旁邊有Buffet餐廳、貨櫃快餐同超市等，全日喺裡面都唔會餓親。不過日頭實在太曬，都係夜晚先喺室外活動為妙。

可能呢度今日先第一日開放，入住球迷得小貓三幾隻，有個CNN記者嚟到採訪，問我哋可否接受訪問，我哋梗係博上鏡啦，仲帶佢去到我哋間方艙參觀。

港婦拍咗呢段片，介紹球迷村各項設施。

從球迷村行三分鐘就可以去到Free Zone地鐵站，幾方便㗎，我哋趁呢日賽事未開鑼，搭車去Ras Bu Abboud沙灘行下。

荷蘭躉遇著雲迪克廣告，當然要來張「合照」。荷蘭，加油！

呢個沙灘原來係要畀錢入場嘅，不過世界盃旅客有Hayya卡一卡旁身，免費。要收錢以為梗係好特別，仲要排晒長龍，點知⋯⋯咪就係沙灘一個，有啲沙灘椅咁囉，全長1.2公里。

日落後，我哋喺網上search到一間海鮮餐廳，叫做Harbour Seafood，去到見入面得兩個客，仲諗緊係咪伏伏哋呢？最後都係入咗去，然後連嗰兩個客都走埋，得番我哋一枱，好似包場咁。但係冇伏喎，啲海鮮好好味，龍蝦肉爽口彈牙，焗蟹蓋嘅汁香得嚟冇冚到蟹肉鮮味。食食下有17個日本人入嚟，成個場當堂旺晒，原來佢哋係日本隊嘅工作人員。佢哋主動同我哋打招呼，仲問我哋乜嘢好食。我哋食飽離開時向佢哋高呼：Good Luck Japan！

by港佬