Tyson Yoshi用4年時間盡力生　造人大計進度順利

歌手Tyson Yoshi（TY）今日（3日）出席尖沙咀舉行的活動，新婚假期結束後，TY宣布復工，周日會參演中環舉行的露天音樂會，在休息期間，因為食增磅，所以要加大運動量 ，問到胸肌可有增長？他就謂：「個波就冇細到，面就瘦咗，之前踩機5日就夠，但因得閒就踏多日。」

至於生BB可有進度？他不諱言準備中：「都ok順利，計劃35歲前生，依家31歲都仲有時間，4年時間內盡生，暫時最多兩個小朋友，（太太生B有功，可有獎賞？）睇吓佢要乜囉，我哋安全啲嘅家庭車都有，希望夠錢唔使賣車囉，（可以要求買樓？）冇諗，唔熟行情喎，好似租樓舒服啲，我冇置業，因為啲錢放喺車上面，依家約有10部車，有啲係收藏，成日唔啟動部車會壞，所以我去學整車，學咗一晚，整車都係樂趣，捐車底唔邋遢，好玩，好開心，有整出興趣，會知部車發生咩問題，唔使人哋話咩就畀錢。」但他說現時修車技能只屬皮毛，會繼續進修，他日學成也不會免費幫藝人朋友整車，因處理自己多部座駕已夠忙 ，笑言：「我幫佢哋整車可能收得仲貴，亦無意經營車房。」

談及好友林家謙未有邀他任嘉賓，他就話因好友只請女嘉賓，況且他不想個唱嘉賓重複，但依然詐嬌謂：「佢好衰用完即棄，（咪似避孕套？）係呀，冇乜分別，用完就踢走，不過我冇投訴，都唔係好想幫佢唱，睇騷仲舒服，睇咗尾場，覺得好睇，我都想再開騷，但唞吓先，開騷好攰，（做乜懶咗咁多？）我今年都好出力啦，11月就出第7首歌啦，結婚又好攰，其實仲有歌嘅，但等出年啦。」

又談及今次聯乘以衫為主，他也有考慮過推出汽車相關小物件，亦有諗過推出男裝內褲，不過女裝內褲就未夠知識，但有謂粉絲以女性為多是大市場，他認同：「都有道理，（推出女性內衣？）係呀，佢哋掟好多內衣樣本畀我，但出男裝衫係有私心，想自己着，其實賣衫都係為興趣，如果賺到錢更好，我上季出過女裝衫，但發覺佢哋鍾意着男裝衫多啲，可能我着女裝上身會好啲，戴Bra着T-back內褲就有市場，但我唔敢着囉。」

東網網站 : https://on.cc/東網Facebook專頁 : https://www.facebook.com/onccnews/