吳業坤自揭與太太相識經過　曾靠Facetime解相思之苦

歌手吳業坤接受電台節目《星光背後》訪問，談及4年前娶得日籍嬌妻濱口愛子，他稱於2018年開始學日文絕非為追女仔，主要是因網上認識了音樂人，有機會談合作並到日本發展，巧合地亦經日本音樂朋友介紹認識太太，他說：「係緣分，一識佢幾有好感，畀佢好有自己個性吸引，相處好舒服。」

他與愛子認識不久後疫情爆發，坦言幸好有科技，解決相隔異地相思之苦：「Long Distance咗一段長時間，好彩有網上平台，可以Facetime一齊睇劇或電影，或者一齊對住個Mon飲嘢。」他承認婚前二人實際相處時間只是數個月已計劃結婚，他說：「究竟要拍拖幾耐先可以結婚？7年？10年？有啲人3日就結婚！無嘢係絕對，總之我覺得係Timing要做呢件事！」

問到他為何認定太太為適合的伴侶，他說：「係佢所有嘢！靚唔靚見仁見智，最重要係佢唔會覺得我係吳業坤，我入行15年，大家會畀唔同嘅報道或者作品影響對我嘅感觀，而我可以用最本我嘅身份同佢去相處，我唔係講吳業坤係一個好勁嘅人，但係佢就係鍾意我本人，同我真實性格，係好難得。」

吳業坤感激太太為他犧牲日本一切來港定居，他謂：「求婚前都傾過，佢思想幾傳統會嫁雞隨雞、會跟老公姓。到講到實體經濟問題，首先我響日本搵唔搵到錢？其次佢嚟香港又會唔會習慣？最後我無得放棄香港事業，所以佢要放棄日本嘅工作。」至於老婆可有考慮日本的雙親，他說：「好彩日本年青人同香港人好唔同，日本人好早就離開屋企去東京做嘢，係習慣咗獨立，主要係佢適唔適應嘅問題。」他指太太適應力及語言學習能力強，居港3年多來，已解決語言問題，也在港認識了不少朋友及已成為KOL。

2010年《超級巨聲2》入行的他，等了5年才有機會出歌，在等候機會的時刻，見許廷鏗及馮允謙已有新歌推出，他曾覺得：「成日諗點解機會唔係我，無諗自己有幾唔得！」到爆紅2年過後，深深體會何謂長江後浪推前浪，他又說：「我成日用滑水嚟形容，我本身諗住個浪細細地會滑得好順暢，但突然嚟咗個超級大浪，我滑到好高亦可以滑到，但我係唔識落番嚟，亦唔識點繼續接下一個浪。當時我嘅技能都唔能夠承接，睇番我以前啲相，又肥、頭髮又亂梳、眼鏡又核突又無突破，點會繼續有人支持我？起跌無得唔接受，唔同我學空手道努力就會有回報。」

經歷起跌，他學會感恩有機會出非商業性歌曲，不諱言：「講真《感激的直拳》，搵邊個聽先？」不過空手道確令他學懂做人要有野心，就算贏不到，亦不可以輸，今年是他入行10周年，所以都想舉行巡唱，而內地各站已展開，目標是：「希望一站一站做返嚟（香港）。」

東網網站 : https://on.cc/東網Facebook專頁 : https://www.facebook.com/onccnews/