Twins宣佈紅館騷加至8場　「組合22年仲開演唱會好難得」

蔡卓妍（阿Sa）及鍾欣潼（阿嬌）早前在社交平台分享香港演唱會海報，宣佈Twins將於2024 年1月21-23、25-27日 於紅館舉行6場《TWINS SPIRIT SINCE 2001 LIVE IN HONG KONG》演唱會。今早（11月15日）進行優先訂購，秒速爆滿。英皇娛樂宣佈加開兩場，由6場變8場。

Twins相隔9年重返紅館，瘋狂引爆回憶殺，今早的優先訂購不到兩小時已經宣佈售完，下午英皇娛樂即時宣佈，加開1月28日至29日兩場。之前Twins於紅館最多開5場。

今次破紀錄開8場，不單令粉絲興奮若狂，亦令阿Sa及阿嬌非常開心，阿Sa表示「以組合來講，入行22年仲可以開演唱會，企喺個台度同大家慶祝，真係好難得，呢個演唱會對我哋嚟講係好有意義！知道咁多人仲繼續支持我哋，又感動又開心！希望到時大家可以有一個好好玩嘅晚上。」

今次演唱會的公售日期是阿Sa生日，而演唱會頭場就是阿嬌生日，阿Sa笑道：「真係咁橋喎，紅館期邊有得揀話想邊日，第一次公司講個開騷日期，我哋都覺得好奇妙，所以公司就話，不如喺我生日嗰日公開發售啦！咁兩個生日都可以雙喜臨門啦！ 」

阿嬌表示，「揀得中呢兩個日子售票同開show都係第一次，覺得好開心好受重視。加場雖然開心，但都開始有啲壓力㗎，希望到時可以做到最好畀大家！」阿Sa表示，今年生日願望一定是做好個演唱會，「仲有係身體健康啦，嚟緊要開始排舞練歌，好身體好緊要。」