馬拉松與人：Edward 台北馬拉松

幸福不只是結果，也包含那些走過的過程。
世界本無光，後來你闖進來了，
還帶著星星和月亮。

初馬渣馬4:47:34 第二隻馬台北馬3:54:20
今次終於完成SUB4呢個小小里程碑，諗咗幾日，打唔打返小小嘢紀念下，點知愈打愈大篇！

始終都算係大PB，要PO段飛機文去記錄一下。
12月17台北馬拉松之後記…

賽前準備：

回想返上年渣馬初馬，不知天高地厚嘅我係咩都唔知同冇乜準備嘅情況下，就踏上咗呢條魔鬼賽道。

到今年，無心插柳嘅情況下喺8月份抽中咗跑台北馬。
用咗幾個月時間去準備，可以練嘅program都會練：低心跑、練斜路＆長課都有做。

每日嘅lunch或放工有時間嘅話都會去「占房」郁下、拉下筋。
準備好哂賽前＆比賽中途補給嘅用品，計好哂食gel食鹽糖同水站飲水嘅時間。

心路歷程：

上次初馬賽前誇下咗海口，結果係好慘烈。所以今次一直都冇特別講一定要跑到咩時間。當然，個心梗係想SUB4㗎啦；早咗兩日到台北，天氣熱熱哋有少少擔心。慶幸冷峰趕到，對超級怕熱嘅我當然係天大喜訊。

賽前心入面已經盤算好比賽策略：好多人話馬拉松30K打後先係真正嘅比賽
所以頭35K希望忍住腳大概係530至540嘅披醒放鬆啲跑，最後7K仲有力先加上去。

賽後報告：

開跑時間：0630；天氣：溫度12.2度, 濕度82%；求生用品：6包gel、6粒鹽糖

1. 開跑頭10幾K都係喺台北鬧市跑，平路居多。身邊好多人相繼仆倒，仲要係幾嚴重下（唔知係天雨路滑還是撞期到馬路中嘅貓眼石，定係踩到前面腳失足）
所以一邊諗住輕鬆啲個form，一邊欣賞鬧市風景之餘，都一直提醒自己要小心注意路面情況。

2. 20K至27K咗右喺高架橋上面橫風橫雨，天氣都幾凍，啲雨撇埋嚟有眼都掙唔開嘅感覺，所以要不段匿喺啲大隻佬背脊後面，搵佢哋幫手擋風。

3. 頭30K都keep到賽前部署同披醒，feel到狀態係可以。幾輕鬆嘅感覺，仲可以周圍搵鏡頭擺pose影相

4. 28至38K都係喺湖邊跑。條路少少窄，又空曠冇遮冇掩，相繼見到好多人開始上岸。由於起步塞咗差唔多3分鐘車。追到30K仍未見到4小時Pacer嘅蹤影，心入面少少焦急。見自己仲係好氣好力，又見已經30K了，就嘗試開始加速前進。

5. 去到34至35K，終於追過4小時Pacer，個人即刻定返啲。可能加速用咗力去到37K開始feel到辛苦，最後5K真係用個捱字頂返去。好彩38K之後又返到鬧市，成條街好好氣氛又多人打氣，咁就繼續前進啦！

6. 去到最後兩K，個橫隔模突然超級痛。有返上年渣馬個陣大爆嘅感覺。好彩嘅係淨返2K先出現呢個情況，一路用意志力話俾自己聽叫自己頂埋佢。幾慢都好都唔可以再行。

7. 最後最後，眼前終於見到臺北田徑場了，有少少洋蔥位不過今次忍住咗。
見到個個返到衝點都舉哂手，我又學人舉下先。

總括：

台北馬賽道好跑，又闊又直，斜路又唔長。氣氛好好，沿途好多打氣團。比賽途中水站足夠，完賽嘅禮品亦非常豐富。有機會嘅話可能下年會再返黎跑。

有一大堆人要感謝（排名不分先後）：
多謝各位親朋戚友叔伯兄弟隊友跑友賽前賽後嘅鼓勵同問候（請各位對號入座）。
多謝屯門班長釘哥呢幾日幾夜台灣之旅嘅照顧同包容。
多謝各位新西兄弟幫同黎sir，佢哋成班實時追蹤我跑嘅過程，真的很窩心。
其實我喺跑緊嘅過程都諗到有呢一幕，所以不斷提住自己好多人支持住自己，唔可以跌速。
咁多人睇住小弟，成為我繼續向前跑嘅動力。

上年渣馬完咗，講老實對跑馬拉松以及對渣馬都有好大陰影；下個月又係去打呢個大佬嘅時候…

希望嚟緊呢幾個星期可以再練好小小，同今次台北馬目標一樣，希望到時都可以「跑」畢全程。

Please follow Insports Hub on Facebook & Instagram
https://insports-hub.com/
FB
https://www.facebook.com/insportshub
IG
https://www.instagram.com/insportshub/