趣怪一點：10合1砧板　消毒磅重磨刀乜都得

砧板係廚房必備的工具之一，一般用家就會揀設計、物料，有冇諗過砧板都可以多功能呢？眾籌網Kickstarter上架的ChopBox就可以做到呢點，ChopBox大部分竹製，天然有機兼且硬度十足，唔似得傳統木製砧板咁易留下水分及刀痕，並且可以承受150磅。砧板主要分為兩部分，右邊大面積用作切菜，右下角設有2個磨刀工具，而左邊內置一個廚房磅，支援最高6.6磅，可以隨時將食材量度重量，非常方便。另外，廚房磅同時亦為計時器，最長可以設定接近10小時，煲湯、慢煮都用得着！

另一特別是ChopBox用上雙層設計，底部設有坑槽安放第2塊小砧板，可以隨時拉出獨立使用，可以分開處理生熟食材，夠晒衞生。神奇在於主砧板與小砧板之間備有一條空隙，可用作擺放最多3件刀具，並且內置254nm UVC紫外光燈為刀具消毒，官方表示只需1分鐘即可殺滅99.99%細菌，亦唔會影響人體。ChopBox眾籌價最低只需99美元，預計12月交貨。

東網網站 : https://on.cc/

東網Facebook專頁 : https://www.facebook.com/onccnews/