全新親民支線 CDG BREAKING NEWS
日本每年都有無數時裝品牌冒起，有啲出道爆紅但三五季後就後勁不繼變成半紅不黑品牌，即使好彩能捱過十個八個年頭的，人氣都難免有些少滑落，唯獨是由川久保玲領導的COMME des GARÇONS（CdG）可以自70年代出道至今一直紅足數十年，而且衍生的支線系列更一變二，二變四多到數唔晒。對於時裝死忠可能對呢類設計簡單的吸金支線毫不感興趣，但你見玲姐多年來都樂此不彼定時定候推出新支線為無數時裝初哥打開進入CdG衣櫃嘅大門，你就明白到此類定價親民而且通常都有大大個Logo設計的支線系列絕對係有需要存在。
近日COMME des GARCONS就正式宣布於本年7月會推出全新支線CDG BREAKING NEWS，設計就與兩年前GOOD DESIGN SHOP x COMME des GARÇONS聯名系列極為相似，同樣以大大隻「CDG」字樣去貫穿整個系列，並採用搶眼的螢光色系作配搭。是次品牌就提前兩個月推出Preview Collection畀大家率先睇吓辦順便試吓水溫，新系列除了推出Tee、Hoodie、Coach Jacket、Backpack及Tote Bag大路單品之外，品牌更特別聯同Adam Lucas、ANTI SOCIAL SOCIAL CLUB、Better ™ Gift Shop by Avi Gold、Brain Dead、Cactus Plant Flea Market及Dreamland Syndicate多個潮流單位合作推出聯名設計Tee款，喺而家Logo先決嘅亂世下，呢個系列絕對係最低成本高效益的設計。