白鹿因工缺席Poster拍攝　《奔跑吧》被怒轟陰間P圖

內地一線小花白鹿人氣高、收視好，佢除咗拍劇多人睇之外，佢更係長壽綜藝節目《奔跑吧》固定成員之一，玩得又唔錫身嘅表現，一早就俘虜大批節目迷支持。今日（14日）嚟到第13季官宣，大合照Poster自然就係粉絲們嘅戰場，當中就見到白鹿只係被P圖當「現身」，當中更只PS上半身照，相當唔好意頭！

白鹿粉絲群起圍插，狂鬧《奔跑吧》節目組不公、不當咁對待，並要求節目組立刻整改海報，杜絕「陰間P圖」，按照嘉賓參加時間早晚更改站位，將白鹿全身人像擺喺海報中「該放的位置」。

此事立即鬧大，直奔熱搜第一位，原來大合照拍攝當日眾成員均有現身，惟白鹿因要趕拍劇而無奈缺席，點知今年以白鹿白衣半身人像相框P入官宣海報之，令粉絲忍無可忍，迫使《奔跑吧》節目組公開道歉及改圖。粉絲更列出《奔》對白鹿多次不公平之舉，如去年將白鹿社交網ID打錯、削減白鹿鏡頭、唯獨刪除白鹿劇集宣傳等，加上以往有成員缺席合照，都會用全身P圖頂上，今次疑有大細超之嫌，引發外界熱議，一轉眼就鬧到上熱搜首位。

東網網站 : https://on.cc/東網Facebook專頁 : https://www.facebook.com/onccnews/