曼城對阿仙奴賽後評 阿仙奴缺乏鬥志？
英超聯賽冠軍關鍵一戰，榜首阿仙奴對戰第二位嘅曼城，賽前阿仙奴領先5分但踢多兩場，變相呢場6分波將會好大程度決定今季聯賽冠軍🏆今日主場出擊嘅曼城由新穎嘅3-2-4-1踢法轉返4-3-3陣式，由卡爾獲加(Kyle Walker)踢右閘，艾簡治(Manuel Akanji)擔任左閘，上場上演帽子戲法嘅馬列斯就先列後備。另一邊作客嘅阿仙奴繼續勝利十一人，今日格列沙卡復出，一對中堅就由賀定拍住加比爾👀
上半場曼城嘅控傳可以話係游刃有餘，有前場逼搶，有後場搓上嚟，亦有引導阿仙奴上前逼搶，開波7分鐘史東斯後場大腳送前，夏蘭特中場一控再傳比迪布尼，半場推進三人包夾之下遠射近柱入網，為曼城領先1比0。早早領先嘅曼城更加熱衷於控球在腳尋找空間，上半場夏蘭特已經有4次起腳3次中龍，阿仙奴後防只能夠苦苦支撐🥹而作客嘅阿仙奴未能給予高強度嘅壓逼同搶截，未有燃點決心嘅佢地控球只有4成，起腳亦只有兩次，最有威脅已經係湯馬士柏迪嘅遠射但唔中龍🥵臨完半場前曼城透過罰球傳中，史東斯一頭頂入為曼城領先到2比0。
下半場阿仙奴未有作出調動原班人馬應戰，但取態上依然緩慢唔夠積極，54分鐘奧迪加特中場傳球被迪布尼搶到，篤前比夏蘭特後向前，殺入禁區左路接應夏蘭特回傳快射入網，3比0擊潰阿仙奴信心同士氣。落後嘅阿仙奴未有展現決心，兩翼未有作出零星突破，固然曼城嘅控傳相當強勁，但阿仙奴給予嘅壓力同現展嘅拼勁亦唔合格，傳球組織太慢，場面直到80分鐘後先有起色，尼基迪亞同列斯尼爾遜嘅入替增添活力同變化，或者係初生之犢不畏虎，其中尼爾遜嘅突破就協助阿仙奴追返一球，86分鐘尼爾遜落底傳中博到角球，中堅賀定射成1比3，阿仙奴至少追返一球。
最後夏蘭特係95分鐘打破「入球荒」，曼城4比1主場大破阿仙奴，阿仙奴今場展現嘅態度完全無爭冠水平，如今已經4場不勝嘅阿仙奴雖然仲排係榜首領先曼城2分，但比曼城踢多兩場，榜首位置岌岌可危，當然兩隊分別有5至8場嘅聯賽，聯賽冠軍仍然有變數，但阿仙奴必需要重現季初嘅侵略性嘅信心🫠
Follow 足球港場Instagram