卡塔爾特集：被粉色小屋環抱的幸福
卡塔爾世界盃日記 Day13
泡菜仔瘋狂之夜
中午離開球迷村出去行下，首先喺間非常地道嘅餐館醫肚，中東咖喱配Pita烤餅，風味獨特。呢間餐館雖然座落市中心，但係裝修簡陋，而且要上一層樓梯去到閣樓用膳，好少外國人幫襯，因此餐牌都冇中英文，要靠Goggle翻譯，價錢自然親民得多，識食梗係食呢啲。
午夜後，開波前，去貨櫃公園（Box Park）遊走。貨櫃公園位處郵輪碼頭旁邊，相信住郵輪酒店嘅球迷一定去過，我哋住得偏遠，今日特登嚟睇下。由市中心行入去大概要30分鐘，先要經過MIA Park，然後沿海邊前行，海上泊滿啡色遊艇，又有水上電單車出租。
Box Park呢個臨海公園由好多五顏六色嘅貨櫃組成，除咗有打卡點，仲有餐廳、cafe同快餐車，喺度散下步，行到攰飲杯咖啡，欣賞遊艇景日落，幾輕鬆愜意㗎。
向住郵輪碼頭前行，轉眼間充滿希臘風情，呢度叫Mina District，到處都係粉色小屋，小店林立，有唔少畫廊，文藝氣息濃厚。
Mina District恍如童話之城，係卡塔爾政府令舊碼頭區煥然一新嘅重大規劃。
差不多開波，搵咗間咖啡店，坐咗喺室外位置開macbook睇直播撐南韓，對面剛好有大電視播烏拉圭嗰場，同時睇晒。南韓要出線其實非常艱難，贏波都未夠，又要烏拉圭贏，又要烏拉圭唔好贏咁多。當然最重要係做好本份，點知泡菜仔先失一球，幸好迅速追和，但膠著直至補時，大勢已去之際，孫興民忽然嚟個妙到毫巔嘅傳送，再一次創造奇蹟。對面大電視影住蘇亞雷斯掩面痛哭，同時加插南韓球員完場一刻興奮慶祝嘅畫面，我都幾心涼。
其後返到瓦其夫市場食飯，大道上不斷有韓國人唱歌歡呼，一直到午夜。我叫咗一碟咕嚕蝦球，好鬼酸，不過每當傳來韓國仔歡呼，最酸嘅一定係隔籬兩枱烏拉圭客，整晚不發一言。
是日賽果：
南韓 2:1 葡萄牙
加納 0:2 烏拉圭
塞爾維亞 2:3 瑞士
喀麥隆 1:0 巴西
by港佬
港婦漂流：
https://www.facebook.com/kennis.chiangmai