《夜王》觀後感　《毒舌大狀》班底炮製出截然不同嘅故事

《毒舌大狀》班底炮製出新作《夜王》，拍出截然不同嘅故事，一上映已經取得亮麗成績。同《毒舌》一樣，大家唔好當佢係賀歲片，入場享受個故事就好。
（以下有劇透）

「假使可以貫注心意 Everyone is a Superstar」

電影起承轉合寫得順暢，由夜場日常開始，到面對危機，再化險為夷，全程節奏快，超過兩個鐘都無冷場，仲要無停過笑聲。對白非常精警，就算有大量粗口都唔會好核突，反而變得貼地搞笑，「形容詞，唔係動詞」更加將港式粗口嘅精髓呈現。

後段呃太子峰嗰部分寫得精彩，整段戲好似睇緊舞台劇，喺同一個場景不斷有事發生，觀眾跟住主角們一齊緊張。除咗顯示夜場特色，仲比每個角色發揮空間，估唔到講夜總會嘅電影可以整到段高潮戲，戲劇性十足。

「我的真的想要知誰定那星秀位置誰監管星空各種事為甚每星亦有著名字」

講完劇情就講下角色。

歡哥同幾位女主角互動充滿火花，亦感受到佢對東日嘅熱誠同愛，子華近年已經成為票房保證，就算做正劇，無咩搞笑位依然有種吸引力；V姐表面霸氣，其實內心有柔弱一面，只可以話Sammi風采依舊。

阿倫carry曬套戲嘅笑點，對白同行為勁抵死過癮；小野做奸角都相當搶鏡，做到二世祖嗰種自大不羈；不過要數最深刻一定係阿Fish，佢每個造型，每一幕都勁靚，魅力沒法擋，同歡哥一段情更令人動容，明明人人都話歡場無真愛，但佢付出嘅情卻真摯動人。

雖然《夜王》有大量演員參與，但導演將戲份安排得恰當，好似ChiLing、葵芳、結衣依啲戲份唔多嘅角色，都有令人深刻嘅場面。

「祈求能實踐希冀的事甜夢內已經試驗多次藍色空中鑲嵌一字就用五千顆星組我名字」

整個夜總會佈景非常像真，加上一大班小姐，做到嗰種花天酒地，不分晝夜，盡興狂歡嘅感覺，讓觀眾能夠完全投入其中，作為未去過夜總會嘅我更加充滿新鮮感。加上喺尖東取景，配埋夜總會嘅佈置，充滿舊香港嘅味道，更有份淡然嘅唏噓。

夜總會喺戲內戲外都係夕陽行業，同依個城市好多事物，甚至人與人嘅關係一樣，曾經多麼光輝快樂，終會有結束一刻，我地無法改變。天下無不散之筵席，其實只要留下過美麗嘅時光，依段經歷就會化成珍貴嘅回憶，一直存在。

「我真的想要知誰定那星秀位置誰監管星空各種事為甚每星亦有著名字」

全套戲唯一可惜，係睇得出唔少角色背後嘅故事刪剪咗，不過故事已經夠完整豐富。當然如果喺IG放返啲加長片段就最好了！

「如閃星天空裡居住造就我最美的一個奇遇」

作為每年最大嘅檔期，去年三套傳統賀歲片口碑同成績都麻麻，但今年不論《夜王》定《金多寶》都帶到一點驚喜比觀眾，各有各出色。再次證明賀歲元素只係錦上添花，一個吸引嘅故事絕對更重要。

「天的賞賜世界一致 Everyone is A Superstar」

最後，感謝吳煒倫導演拍出一部咁出色嘅電影，讓觀眾親身感受香港獨有嘅夜場文化。

娛樂