《造星VI》Kai成第11人大熱 被爆欠債發文親回應
ViuTV《全民造星VI》已播到20強誕生，大會特別為被淘汰的參賽者設立投票機制，得票最多的可成為「第11人」入決賽。其中一直表現不俗的張家文（Kai Cheung）被淘汰後，有大批網民替他不值，力推他躋身「第11人」，暫時力壓熱門周德誠（牛牛）、關誌諾（Harry Kwan）和姚浩銘（Homing）排名榜首。
Kai Cheung成為「第11人」熱門後，旋即引起網民熱議，當中更有網民流出年前Kai Cheung前女友的舊限時動態截圖，指控Kai欠債並棄養。對此，Kai今日（12月10日）親自在該帖文下留言，解釋事件來龍去脈：「各位早晨！！本來並唔打算回應呢件事…但確實睇完有啲難受同委屈。等我係度同大家簡單講解下！就第一件事，其實我喺造星六第三集亦都好如實話俾大家聽我嘅過去，亦都坦言自己亦曾因小生意而欠下30 萬款項，因此，只能返地盤還清。唉，呢個時勢生意確實難做…就圖文中提及的『女朋友』確實有幫助我度過難關，亦感恩過去嘅人守望相助，其實事情已經過去咗數年。亦得知對方亦有一個愛錫自己嘅伴侶，感到安慰。希望大家唔好騷擾他人！」
至於「狗狗棄養事件」，Kai亦有作出回應：「本人事實曾經收養一隻我名為『喪標』的哈士奇，其實小狗係一位親戚朋友，因為狗媽媽意外懷孕而生出6 隻嘅其中一隻！但因家居條件難以即時應對情況。而我得知事件後，亦因一直都非常喜歡小動物，所以申請暫時托管領養！但可想言之哈士奇嘅成長速度的確真係太快……而我嘅舊居處都無法容納『喪標』。因為想小狗有個舒適而健康快樂嘅環境，因此經過五個月嘅相處，最後亦歸還原主人！現在亦過上開心愉快嘅狗狗生活生活！現時本人亦有養五隻小貓，亦都視為自己嘅兒女。本人亦都反對棄養問問題，亦在考慮到現今經濟狀況，及居住環境先作次決定！感謝各位」。
於《全民造星VI》晉身30強後被淘汰的Kai Cheung（張家文），出生於2000年3月9日，現年25歲，報稱身高174cm、體重73kg， MBTI為ENFP；職業是自由工作者，他在節目透露曾從事地盤工作。