陳懿德轉跑道爭「最佳女主持」　兩年內將不可能變成可能

無綫小花陳懿德近年備受公司重用，工作甚多，雖然最終離奇未能打入台慶頒獎禮「飛躍進步女藝員」10強，但卻殺入「最佳女主持」10強之列，與一眾前輩爭奪獎項。她在社交網發長文分享感受：「我好想知道憑住自己嘅努力，我可以行到幾遠。就係咁，2021年我入咗行，喺呢幾年我明白到，其實有時你以為冇可能嘅極限其實並唔係想像中咁遙不可及，有時可能係幸運，而有時可能係在於你有幾想做到件事，你有幾相信自己可以做到呢件事。」

陳懿德指近兩年有很多「不可能」的機會發生在她身上：「上年踏上大show司儀嘅路，做港姐、台慶、奧運、節目巡禮，甚至年頭竟然有機會自己一個做頒獎禮司儀，再到第一次出埠做MC，同細個最鍾意嘅少女時代同台，踏上啟德嘅舞台，再到自己一個主持選秀節目。喺呢啲機會出現之前，我從未諗過經驗尚淺嘅我竟然可以擁有呢啲咁難得嘅機會。呢啲「冇可能」原來都有可能發生。」

對於做主持陳懿德認為對她來說並不是一份工作，而是一份使命，是一趟探索人生不同「可能」的旅程：「雖然我仲有好多需要學習嘅地方，但我希望陳懿德都可以為螢幕前嘅你帶嚟一點鼓勵、一點力量。特別係努力追夢嘅你，想證明自己嘅你。追夢嘅路從來都會有點崎嶇，甚至有啲時候你會跌得好痛，但我相信呢啲經歷都係缺一不可嘅養分，都係為咗成就更強大嘅我哋而存在。希望我哋一齊努力，向住未來更多嘅『冇可能』，向住最佳嘅自己進發。希望你可以支持，向住最佳女主持努力嘅陳懿德。」

東網網站 : https://on.cc/東網Facebook專頁 : https://www.facebook.com/onccnews/