娛圈單打︱㗎仔非禮罰萬五　顛覆人們嘅三觀

上村謙信難得捱出頭，卻因手多多而自毀前程。

憑BL日劇《未成年》走紅嘅日本新進男星上村謙信，3月來港舉辦粉絲見面會，出席慶功宴期間竟然猥猥瑣瑣手多多，摸女翻譯員大髀，仲撩對方「一齊去廁所」，令人嘩然。呢啲斯文敗類當然唔可以輕易放過，女翻譯員報警，上村被控非禮，日前法庭裁定罪成。

法官嚴詞批評上村不尊重女性，必須予以譴責，但最終只係判罰款1.5萬港元。吓，乜刑事非禮案都可以判罰款嘅咩？本欄孤陋寡聞，都係第一次聽！諷刺嘅係，同日有另一單非禮案宣判，前ViuTV男攝影師被控於拍攝期間非禮女撰稿員，罪名成立，判監8星期。嘩，雖然案情不同，但兩者判刑有咁大分別，難道日本仔有特權？

嗱，法官就話，考慮到案情及求情，認為上村案情較輕微，有空間不判監，而且佢僅獲批准在港逗留，判感化令同社服令不切實際，因而下令罰款喎。上村聞判後一度企唔穩，到庭旁聽嘅女粉絲仲哭咗出來。喂，唔使坐，執番身彩啦，喊乜鬼！

之不過，法庭對外國人咁仁慈，怕唔怕立壞榜樣，變相鼓勵外國人非禮港女呀？就算斷正，擺低一萬幾千搞掂，唷，使乜驚！何況罰款係點計出嚟，真係令人𢱑晒頭！難怪唔少網民直斥，判決顛覆咗香港人嘅三觀！

講番上村，26歲仔前途盡毀，真係自己攞嚟。辯方求情嗰陣，揭露佢自小喪父，跟媽媽同家姐相依為命，15歲投身藝能界，好不容易走紅，結果呢鑊嘢發生後，即時遭公司解約，兼索償300萬港元違約金！喂，色字頭上一把刀，家陣先至嚟賣慘，有鬼用咩！

娛樂