【方以文專欄】TVB《福爾摩師奶》EP01短評：開局迫力不足

松松姐姐做Judy，第一集到最尾嗰幾分鐘先落難，之前做到咁天真冇害係可以嘅，亦都可以等佢之後落難油麻地時睇見民間實況、自己要經歷窮人生活時做個轉變。暫時咁睇，Judy係一個受到老公保護、鍾意福爾摩斯嘅貴婦，如果想寫佢天真同埋有查案天份，係可以共存嘅。不過佢天真同埋查案勁呢兩樣嘢就mix得唔太好。

Judy事無大小都拎福爾摩斯嚟講，擺明係想話畀觀眾知佢有幾相信或者幾咁想自己可以follow到神探嘅腳步，但咁樣令到我覺得佢係煩膠多過貴婦。不過轉個角度睇，呢類煩膠都幾符合天真嘅性格。

天真性格做到喇，咁查案天份呢？重點靠「封爵party」去展現，但成個party太過模稜兩可。唔見勳章真係好唔合理。如果爵士一早就拎個勳章去裝飾頂帽，搞場咁大嘅玩笑就好鬼無聊，一早就唔帶個勳章都可以啦，搞咁多嘢。我明要表現到Judy有查案能力，但係個氣氛真係兩頭唔到岸：依家拍得唔緊張就查乜都假，但係拍得緊張咩又覺得小題做咗，因為純粹係爵士想畀個驚喜夫人。

咁點算好？如果一早寫爵士兩公婆都係出晒名嘅福爾摩斯迷，來賓一齊同爵士夾埋，畀個驚喜查案party畀Judy，等佢玩得開心之餘又可以表現到佢查案有啲天份，會唔會好啲？因為無論點設計，如果冇死人就一定唔夠後尾開膛手出山咁震撼。避重就輕，將唔見勳章呢件事變做爵士自己設計去氹老婆，既可以表現Judy嘅查案「天份」，又可以表現到Judy始終都喺老公嘅照顧下查案，令到佢之後自己一個人面對奇案時有更多變化，仲好睇啦。

另，啲布景啲血真係好流呀……

[演員表] 陳松伶 飾 祖迪費查 / 黃智賢 飾 關一夫 / 陳煒 飾 鮑妹娣 / 徐榮 狄德英 / 江嘉敏 飾 丁曉芙 / 余德丞 飾 游池 / 林韋辰 飾 喬百川 / 布偉傑 飾 菲臘費查 / 王綺琴 飾 丁月 / 楊卓娜 飾 焦范南茜

撰文：方以文（ig: fongemantvman）