冇份同黃宗澤鑽油　陳豪嘆係人生污點

藝人黃宗澤（Bosco）、馬國明、陳豪、羅子溢、陳瀅、蔡潔和何依婷主演劇集《執法者們》將於明晚（23日）推出，台前幕後今日到荃灣出席記者會宣傳造勢，吸引大批粉絲到場，場面墟冚。大會席間播出預告片，吸引途人煲劇。

Bosco、陳豪及馬國明齊齊受訪，談到內地點擊量逾4億，Bosco笑說：「開心㗎，最緊要大家鍾意，拍得咁辛苦喎。我哋1人1億都3億啦，餘下1億其他（演員）分埋，哈哈！」談到重頭戲於鑽油台拍攝，他獲「主帥」樂易玲封為「大內主管」，負責提供吃喝玩樂，他說：「我哋創咗電視史首次喺鑽油台取景，我都係第一次去鑽油台咋，辛苦嘅，但Feel到大家嘅齊心，因為大家都未經歷過咁嘅環境。」陳豪聞言打趣：「我冇份去鑽油係人生嘅污點，真係好羨慕Bosco，嗰種經歷唔係人人都可以體驗。」

談到戲中女兒何依婷已為人母，陳豪於台上搞笑指自己榮升「公公」，且自爆家中9歲囡囡已開始憧憬戀愛：「我梗係灌輸中國人嘅思想畀佢，我都同佢講爹哋成咗年先拍拖，佢冇其他選擇，哈哈！估唔到佢都係戀愛腦。（你驚唔驚？）梗係驚啦，話畀佢聽掂手仔都好大件事！（接唔接受到演一個有咁大個女嘅爸爸？）喺戲劇嘅世界乜都有可能，我都演過郭羨妮老竇啦。」

至於馬國明於戲中被陳瀅狂追，他謙稱現實生活中從未試過，搞到Bosco取笑他：「佢同湯洛雯係初戀。」馬國明即說：「咁又未至於，我初戀21歲，係讀專上學院嘅同學。（你追人？）冇話邊個追邊個，好自然咁就喺埋一齊。」

東網網站 : https://on.cc/東網Facebook專頁 : https://www.facebook.com/onccnews/