蕭正楠初為親子歌唱節目任評判　取經將來與囝囝父子檔登台

藝人蕭正楠榮升人父後積極搵奶粉錢，除不時夥拍好兄弟曹永廉於內地舉行演唱會外，他近日更落實為7月播出的馬來西亞人氣親子歌唱節目《好聲Family》第六季擔任評判，為一眾參賽家庭帶來中肯點評。談到今次獲邀加入節目，阿蕭表示：「平時我去馬來西亞商演，好多時都唱歌畀大家聽，估唔到今次玩我坐定定聽大家唱歌。作為評判，我會比較留意整個家庭舞台上嘅合作性，唱歌當然要好聽，不過默契都好重要。」

阿蕭更打趣今次自己亦會透過今次擔任評判取經，從節目中獲得啟發，希望未來有機會與兒子組成父子一起登台表演。另外，他近日亦不忘於社交平台放閃，只見他與太太黃翠如拍拖到超市掃貨，期間2人表情多多玩自拍，阿蕭更留言：「今時今日，拍拖嘅環節，就梗係一齊去超級市場掃BB用品。拍拖嘅甜頭，就係兩包薯片加兩包尿片，我唔否認，係開心嘅！」認真Sweet到爆！

東網網站 : https://on.cc/東網Facebook專頁 : https://www.facebook.com/onccnews/