【大放笑彈】杜汶澤爆醉酒瘀事 鄭中基急急上台補鑊

鄭中基昨晚年三十在紅館開騷，跟觀眾送狗迎豬，鄭中基還邀請好友杜汶澤齊倒數，阿澤趁鄭中基換衫時，大爆二人陳年趣事：「中基同我識於微時，我哋成日飲醉酒，成日都醉酒鬧事，我打算由依家開始講，講到十二點。有次同佢參加人哋婚禮，我哋飲醉咗，撞到林小明，搞電影嗰個，我哋飲到好醉，同佢講，不如你開部戲畀我哋，打贏周星馳，邊夠我哋兩個好笑。跟住佢（林小明）話『唔係，阿澤，我諗咗套戲好勁，叫《重案黐孖GUN》，知唔知有幾勁？個GUN字係英文。』G~U~N GUN喎，鄭中基就犀利，佢話剩係個GUN係英文好巴閉咩？你將『黐孖』變埋英文，我就話你勁吖，跟住佢黑晒面走咗佢，之後我哋都好似好少開林小明嘅工。」

此時剛換好歌衫﹑頭髮也未吹乾的鄭中基，急急上台打圓場，鄭中基說：「唔好再講林小明，今晚個騷佢有份呀，我未換完衫，個頭仲濕，都要上嚟，我之前唔係咁嘅意思呀，小明哥。」全場爆笑。

隨後二人合唱《財神到》，一起倒數迎豬年，並手執紅袋落台討利市，而觀眾送給他們的利市，將捐予慈善機構，和觀眾齊齊行善。

另外，鄭中基又請來好友陳少琪女兒陳明憙（Jocelyn）擔任每場嘉賓，二人合唱鄭中基新戲《阿龍》的插曲《放下》及《製造浪漫》，而Jocelyn表示上台前非常緊張，但感謝鄭中基父子賜予信心。

（即時娛樂）