東京搵食 唔想中伏、受氣、失望 6個位要小心
東京搵食 是一門學問，如香港一樣，在食方面，總會危機四伏，例如日本人收一個價，見大家是香港人，則收另一個價。又或某些食店力獲某旅遊天書或旅遊達人推介，但入場一試之後，令人失望非常。所以小編整理以下6點心得，免大家遊日開餐中伏。
第一：有條件的和牛放題
放題絕對是香港人最愛，旅行期間，一有人提到放題，即使是有多累多不滿，不少人總會即時「展歡顏」，但原來日本有一種放題，並不是大家一上去，立時可以任食，而是需要滿足指定的消費條件。 有網民Pat Tam分享：「銀座好多（舖）都寫和牛放題，但任食前，佢要你先食個牛肉拼盤，我一個人燒到時間夠都未食完，冇叫過和牛Order……咁就7000日圓！」所以，有資深遊日人士教路，在日本遇到放題時，入場前，先保持冷靜，問清店家的放題守則，免招失望。
第二：見你是遊客即加價
在香港，總有食肆因見客人是遊客，立時加價。同類情況，日本亦有，有網民分享與女友在秋葉原某樓上燒肉店的經歷：「我哋喺門口睇完Meun就搭Lift上去，上到去個Staff見到我哋兩個遊客，於是俾咗一本同樓下唔同價錢嘅Meun我哋，全部價錢+2000Yen，我哋即時掉頭走。」
第三： 東京搵食 勿太信台灣人口味
不少港人外遊，總會參考台灣朋友的旅遊日記。雖知不同地方的人，對食物味道要求均不一。所以，這幾年小編見得最多的評論，就是有人因見某台灣網友盛讚某食店水準一流，於是按圖前往，終大感失望。所以在此勸勸各位，看食評，還是看香港人寫的好，始終大家口味近。
第四：食物或違商品說明條例
香港人遊日開飯最易中伏的，就是在新宿歌舞伎町光顧了劣質食肆。這類食肆通常開在大廈之中，在大街上放滿了宣傳廣告。小編在歌舞伎町亦曾有類似經歷，記得某夜想吃熱東西，且在街上見到一個宣傳和風火鍋的廣告牌，於是按著廣告牌的地址，上門光顧。 就坐後，只見和風火鍋一上桌，無論湯料、湯底均令小編心中爆了一句：「XX！稻香呢嘅！」，如果店內有獅威啤酒供應，小編是完全100％覺得：「我一定喺稻香打緊邊爐！」。到結賬時，老闆還用流利的普通話與小編寒暄，當小編問她來自哪個省市，她只是笑而不語。 所以，小編建議，搵食時，如大家不懂使用類近OpenRice的日本網站先作了解，為求不想失望，建議大家切勿前往開於大廈內的非知名食店光顧。
第五：並非所有食店想做旅客生意
近年，港人遊日開餐，很講求「地道」。所謂地道，就是店舖多開於民生區或民居附近，只做街坊生意，店主對外語亦不太懂。所以，如果大家不是通曉日語，而到訪此等小店，或會招到不禮貌的對待。 如一位朋友所說：「人哋本身都無諗住做遊客生意，你去，佢又唔識同你溝通，加上大家飲食文化同餐桌禮儀都唔同。你去，其實某程度上，係騷擾緊佢。後生小小嘅老闆可能對你黑面，老少少嘅，隨時唔客氣趕你走！」
第六：期間限定 Num 1推介 試前諗清楚
那在日本搵食，如何才叫安全不出事？首先如果是有「期間限定」或本店「Number 1」推介的，建議勿當勇兵，這方面，小編交了很多學費。 如果大家一定要食好西，那就一定要懂得用OpenRice這類型的日本網站，例如食べログ(TABELOG)、ぐるなび(GURUNAVI)、ホットペッパー(HOTPEPPER)。在前往食店前，先了解食客評語，減低出事風險。