郭子豪晚晚視像鄧卓殷傾到瞓 何廣沛衰聲遭高層勸退幕前

何廣沛、郭子豪及方紹聰為今晚（23日）播出一集J2節目《Mean Talk》擔任嘉賓，席間主持林盛斌（Bob）和江美儀讀出3子的負評，對於遭抨擊「把聲真係好難聽，耳朵流產呀」，廣沛直認最近獲TVB高層曾勵珍（珍姐）「提點」，他說：「佢話我講嘢真係唔得，做得好差，不如唔好做呢行啦！嗰刻我終於知道嚴重性。」並謂曾在珍姐房間練習英文咬字長達一小時，他亦很感激對方培育及耐心教導。
至於2017年，傳為江嘉敏甩底倒數騷的郭子豪，解釋當時種種原因導致自己入面亂晒籠，他說：「原因包括屋企，當時同前女友關係處理得唔好。總之唔想見人，有情緒問題。我直頭熄咗手機幾日，匿喺屋企。」子豪感激監製潘嘉德的暖心慰問，之後又自揭與女友鄧卓殷的肉麻點滴，原來二人從兩年前開始，每晚都會開住Video call入睡，令美儀和Bob大嘆「Sweet得嚟好黐線」，子豪續道：「瞓住都唔會熄部電話，第二朝瞓醒又見到對方囉。如果佢仲未醒，我咪開住個Call做住自己嘢先。」