回顧2019／香港十大插畫家，怪叔叔都係得第四名咋！
文化香港，藝術插畫
香港地，呢幾十年，有唔少人都喺到問一個問題，到底香港有冇藝術、文化可言？講咗咁多年，呢個問題其實往往用咗嚟反證，香港係有藝術、文化，而且仲好多元。或者唔太起眼，但如果有心人願意去睇，就會知道入面有好多藝術家，好多精彩嘅作品。隨住網路社交媒體發達，呢堆香港藝術家喺唔同平台都大放異彩，吸引咗大堆Fans睇佢哋嘅插畫，甚至變成KOL。香港人就算唔知佢哋嘅名，總會睇過佢哋嘅作品，相當火紅。今日就等DailyView用網路大數據，同你細數香港十大插畫家係邊幾位，等各位可以Follow佢哋！
DV小教室：網路溫度計透過《KEYPO大數據關鍵引擎》，觀測、爬梳港澳地區近萬個網站、頻道，其中包括新聞頻道、各大討論區、FB、IG以及Blog，從中取得資料樣本數，並以AI語意程式作數據分析。「網路熱度」為主題項目相關的網路posts和comments ，數值愈大代表主題項目的討論度愈高。
NO.10 阿塗
——鵰娜猩！頂硬上！
如果你熟悉網路文化，都會睇過金翅仆街鳥、麒麟怪、五毛蟷、小學雞，呢堆香港人耳熟能詳嘅動物插畫，全部都由阿塗創作出嚟！除咗神獸創作，阿塗近年力撐廣東話，專注香港文化嘅題材，出咗《圖解廣東話》、《圖解廣東話2》，仲喺2018年舉辦《廣東話好雙語》個人畫展，相當「貼地」，力撐本土！呢半年，佢嘅畫作鼓勵無數後生仔，難怪咁多人支持。
image source:FB/阿塗
NO.9 文地貓 Mandycat
——愛貓畫家
文地貓 Mandycat， 可能喺全香港最愛貓，畫得最多貓嘅本土插畫家。香港人咁鍾意用WhatsApp，而家用Stickers溝通仲多過文字，相信都會見過佢嘅圖案。早喺2006年，文地貓已經推出咗繪本《他她牠的床》，之後著作不斷，以描寫男女貓同居嘅生活，同埋相處嘅趣事為主，輕鬆得令人會心一笑。香港人而家愈嚟愈鍾意貓咪，咁多貓奴，佢嘅畫作當然大受歡迎喇！
image source:FB/文地貓 Mandycat
NO.8 丹尼爾。海的兩三事
——力撐香港人
2019年，注定係香港關鍵嘅一年，社會變化影響咗無數咁多人，自然都會引致唔同文化創作出現。丹尼爾。海的兩三事，佢畫出咗時代，時代亦都畫出咗佢，佢就香港時事嘅插畫，WhatsApp sticker光復香港系列，得到好多香港人嘅共鳴，成為咗佢嘅Fans。除此之外，佢熱愛香港文化，尤其係廣東歌，係佢創作嘅一大特色。呢位原汁原味嘅香港插畫家，彈起合情合理。
image source:FB/丹尼爾。海的兩三事
NO.7 謝曬皮 TSE SAI PEI
——以插畫創造希望
香港插畫界知名人物，謝曬皮 TSE SAI PEI，因為佢獨特嘅黑色幽默同美學風格，創作破格突出，吸引咗好多香港人！點解叫「謝曬皮」？皆因佢畢業之後，返工返到「謝曬皮」，決定要用創作化解苦悶，結果好快就突圍而出，用佢自己嘅話，係一位幸運兒。呢位幸運兒，面對香港2019年嘅變化，為美國電台節目畫咗一張2047嘅香港，令好多人睇完，都覺得香港都仲充滿希望。
image source:FB/謝曬皮 TSE SAI PEI
NO.6 珍寶豬
——診所助護奇聞
創作離唔開日常生活經驗，藝術家要與眾不同，往往都係要將佢嘅生活掘出創意。香港插畫家珍寶豬，就以佢診所助護嘅身分，就佢平時工作見到嘅奇人奇事創作，結果相當成功。呢堆故事入面，有開心，有感人，有低能，有好笑，直頭係將人生百態呈現出嚟。珍寶豬創作嘅《診所低能奇觀》系列，更加係熱銷全港。唔止插畫勁，佢嘅文字都相當有趣，想輕鬆吓不妨一睇喎！
image source:FB/診所低能奇觀
NO.5 Plastic Thing
——道盡女子心事
Plastic Thing，單睇個名都知呢位插畫家獨特，佢專以女子心事為題材，繪出無數女人打扮、識男仔、傾八卦、Shopping嘅秘密，其中有好多故事都相當搞鬼好笑，唔怪得咁多香港人睇到笑出聲喇！2019年香港，實在有太多太多唔開心嘅事發生，佢就話，希望2020年嘅創作，可以繼續帶畀香港人更多快樂。做香港人，有時真係好攰，得閒休息吓好重要，千祈唔好逞強呀！
image source:FB/Plastic Thing
NO.4 怪叔叔の散步道
——陪伴港人走一次
重繪人生草圖，再畫戀愛日誌，Cuson 咳神，自號怪叔叔，佢呢兩年經歷咗好多事，但都勇敢面對，重新出發，一路以嚟都有好多香港人支持佢。當香港出事，佢自然都力撐返香港！怪叔叔好多好多嘅創作，都係反映咗香港現況，令佢嘅Fans睇到都眼濕濕，話怪叔叔不愧係有良心有骨氣嘅藝術家。今年佢出咗本新書叫《4張幾開心手記》，各位有興趣嘅朋友，不妨留意吓！
image source:FB/怪叔叔の散步道
NO.3 爵爵&貓叔
──港台友好文化橋樑
爵爵，住喺香港嘅台灣人；貓叔，逗留過台灣嘅香港人，兩個合作插圖設計，介紹台港文化分別，真係天作之合。今時今日，社會變化激烈，台灣、香港呢兩個地方，成日俾人嚟相提並論，話今日香港，明日台灣喎。兩地關係咁緊密，特別要有好嘅文化交流平台，畀兩地人民可以了解對方。爵爵與貓叔就做到呢點，令更多台灣人知道香港嘅大小事，真係好值得我哋支持。
image source:FB/爵爵&貓叔
NO.2 門小雷
——生於香港，衝出國際
1984出生，香港知名漫畫家門小雷，雖然年紀唔大，但佢嘅成就已經可以話衝出本地，走入國際，令更多世界各地更多人，知道香港呢個地方，有咁閃耀亮眼嘅文化。不過，睇返佢嘅人生，就知道呢一切都唔係幸運，11歲已經開始投稿到動漫雜誌《A-Club》，真係相當屈機。門小雷嘅作品，喺中國大陸、台灣以至法國都有出版，充分表現咗佢國際水準嘅實力，第二名當之無愧。
image source:FB/Little Thunder 門小雷
NO.1 大大與小妹
——香港動人愛情故事
問世間情是何物，直教生死相許？喺香港，愛情好似從來都唔係咩永恆嘅事物，嚟嚟去去，就等於整一個杯麵食咁簡單。或者正因為咁，先會顯得出香港插畫家大大與小妹嘅珍貴，佢哋將自己美好嘅愛情故事，用畫作充分咁表達出嚟。好多對愛情都失去希望嘅人，都重新因為佢哋之間嘅故仔，重新燃起鬥志，喺情場之中再戰江湖。大大與小妹，證明咗愛情喺香港，都仲係存在嘅。
image source:FB/大大與小妹
【以上圖文為香港網路溫度計調查結果，未經授權請勿轉載、改寫】
分析說明：
本研究資料由《KEYPO大數據關鍵引擎》提供，分析時間範圍為2019年01月01日至2019年12月27日。
網路大數據系統觀測港澳地區上萬個網站頻道，包括新聞頻道、Facebook、Instagram及各大討論區、BLOG等，針對討論『香港十大插畫家』相關文本進行分析，並根據網友就該議題之討論，作為本分析依據。
本文分析之結果，非參考投票、民調、網路問卷等資料，名次僅代表網路討論熱度大小，不代表網友正負評價。