林奕匡〈高山低谷〉推出十周年　登The First Take演繹全新版本

林奕匡（Phil）的經典歌曲〈高山低谷〉推出十周年，他早前應邀參與日本著名音樂頻道The First Take（TFT）的一鏡到底一次性錄音演出，就演繹全新編曲的〈高山低谷〉。

今次Phil是繼陳柏宇及MIRROR後，第3個香港歌手單位參與The First Take錄音，他為此作出周詳的準備：「我哋重新度過首歌嘅編排，同埋唱法都唔同咗，會諗下受眾係邊個，唔想一模一樣嘅感覺去唱，因為都事隔10年，自己嘅人生同經驗會令自己有唔同感受。我都有練習多啲，仲特登買咗喺正式錄音時會用到嘅headphone喺屋企練習，又會睇下唔同嘅表演者喺TFT佢會點唱，台風係點，又研究下鏡頭擺位，自己喺屋企事先預演一次，希望可以減低緊張程度。」

Phil直言進入錄音室時，還是免不了緊張：「估唔到原來大家平時見到個畫面好似只有自己一個人喺度，但入到去其實鏡頭後有最少接近30人喺度做準備，所以有啲意想不到。不過到正式錄音時，大家就會全部離場。」錄音過後，Phil即時鬆一口氣：「當下第一時間諗到『Oh My God! 錄完喇！』因為籌備期間練習幾多次都好，正式嘅時候係有好多Pressure，但完成嗰一下成個人即刻放鬆，可以真係Enjoy The Moment多啲，我仲同每個同事都擁抱，哈！」能夠在〈高山低谷〉推出十周年登上TFT，Phil坦言這是莫大的榮幸，更道：「能夠唱廣東歌實在太好，希望可以俾全球認識廣東音樂。」

〈高山低谷〉對於Phil來說別具意義，因為當時這是一首決定Phil歌唱事業的作品，所以他一直銘記歌詞內容，他更道：「〈高山低谷〉記載住我人生好重要嘅一刻，由最唔開心到我企得返起身，而家呢首歌成為咗鞭策我嘅歌，佢唔係淨係講低谷要點樣面對，佢仲可以講到喺人生唔同期間，都會遇上唔同高山低谷，會時刻提醒我，要繼續行落去，個終點依然未達到，所以唔可以停唔可以放棄，就好似歌詞咁講：腳下路程難以削短。」