各有各工作忙爆！EO2無意復出：抽時間出嚟都難

久未合體的前組合EO2參與《伍仲衡再搞花臣音樂會》頭場演出，跳唱經典快歌《對你愛不完》、《我的親愛》等，其中伍仲衡在《對》時又跳埋一份。受訪時他們笑言現時跳10多分鐘medley都有點吃力，幸好反應熱烈，講到教埋伍仲衡跳舞，問到教了多久？Otto笑言：「職業舞蹈員嚟講佢唔合格，但音樂人嚟講就合格有餘，好有熱誠。我哋又拍片又真人教，有次夜晚佢視像話唔記得點跳，Osman淨係着條底橫都拍片教佢。」

而問到他們可有意復出？Otto坦言：「其實我哋每次出嚟玩都開心，但真係未有計劃復出。」Eddie亦話：「喺今次演唱會同之前天堂鳥演唱會，我哋四個走番埋一齊已經好開心，復出都係其次，依家出返嚟好似返番20年前咁，但真係未有動機走番埋一齊做歌。」問到他們可有傾過真想復出？他們笑言：「我哋成日傾㗎，但其實自從2013年解散之後，我哋都做咗唔同行業，大家有自己工作，抽時間出嚟都難，為呢個演出想開會都難夾時間。」

東網網站 : https://on.cc/東網Facebook專頁 : https://www.facebook.com/onccnews/