吳文忻化癌為機 與癌細胞「和解」患乳癌認與情緒有關：離不開愛字

去年癌症復發吳文忻，近日接受鍾慧冰（冰姐）主持的YouTube頻道《冰姐的花樣人生》訪問，冰姐問到患乳癌與子宮頸癌，是否跟情緒有關？吳文忻直認不諱：「係呀，好多人都話乳癌﹑子宮頸癌，都離不開一個愛字或者一個情字，（你的情緒影響到有這個病？）會㗎，有㗎，（怎樣可以令自己轉好？）最好早啲自己察覺，早啲去面對佢﹑放下佢，好多時女人去到有拖延症，唔去到崩潰一刻﹑或者真係病喎，或者去到某個位，先肯迫到做呢件事，可能慣咗模式，做媽媽﹑做老婆係咁啦，但好多情緒抑壓咗，自然會生病。」

冰姐又問吳文忻，在她生病期間知她好勇敢，又寫抗癌日記及鼓勵同道人，又問她患病後為什麼唱歌？吳文忻說：「之前都有講，入行時我係港姐，我畢業時係想返嚟參加新秀。（唔做歌手？）嗰時新秀冇咗。（參加《中年好聲音4》？）我直接出歌，唔使去爭，唔好啦，我做呢件事係enjoy，重拾番初心，咁難得有呢個機會，我有呢個諗法都有一段時間，好想『化癌為機』，我自己諗呢個4隻字，cancer畀我哋機會反思，cancer唔係傳染病，係漫長時間，你可能對自己身體及心靈唔好，身體對你控訴而有嘅病，呢個病畀你好好機會反思﹑去諗番有邊啲嘢出錯，最重要係『內在小孩』，好多人工作忙碌及掛住照顧家庭，已經遺忘咗，呢樣嘢要自己深深了解，係好好機會反思及make change，又咁啱講咗出嚟，好多人話畀我聽，有好大正能量及啟發性，我覺得如果能將呢樣嘢last longer，咁都幾好，我有出書及出歌念頭，圓自己歌星夢，將能量化為文字及音樂，可以傳承開去，又有意義。」

冰姐問她付諸實行時會否感辛苦，首先是否要和自己和解？吳文忻說：「係呀，和解呢個字好緊要，可以同癌細胞『和解』，我唔敢話教人，我有呢個啟發去諗，一直話打癌細胞﹑打仗，直至有個導師同我講，試下跟癌細胞『和解』，傾下偈，有研究講過細胞係有意識，每日去讚佢，即係同自己傾，和解﹑和諧，如果鬥嘅話就兩敗俱傷。」

（即時娛樂）