支嚳儀激罕水着放送　生完咁弗自揭Keep Fit之道

《中年好聲音》歌手支嚳儀（支支）平時禾桿冚珍珠，昨日（30日）在社交網大晒水着相騷好身材，雖然已為人母，但依然保養得宜，身材弗到漏，要胸有胸，纖腰毫無贅肉，她發文謂：「終於在忙碌的拍攝、練歌、背稿和阿仔補習的日子裏，到一個陽光明媚的日子給自己充電。」

她在一日內，除了享受陽光與海灘外，還進行冥想、做面部護理、食薄餅、品嘗日式廚師發辦還有雞尾酒，認真識得享受，她笑言：「爭一碗重慶魔鬼辣螺絲粉來做消夜就極致。」不少網民都留言讚她索，支支接受電話訪問時，講到Keep Fit之道，她表示每朝都會食減脂餐，以蛋白質及蔬菜為主，已持續了兩年時間：「仲有我每餐都會先食菜，咁可以減少澱粉質吸收，運動方面，我每日都會拉筋，又會浸浴、浸腳同刮痧，瘦唔係我追求嘅嘢，最重要係身心健康。」

講到工作，支支最近有新綜藝節目，跟顏米羔、黃劍文及周國豐齊主持《今晚有歌廳》，首集的嘉賓就是BIG FOUR，她直言是他們的粉絲，當中跟蘇永康尤其有淵源：「我人生第一個粉絲見面會，就係佢做我嘅神秘嘉賓，我好感恩，佢當年係做《中年好聲音》嘅評判，後來我膽粗粗去社交網搵佢，點知就喺仔仔個幼稚園撞到佢。因為我哋嘅小朋友係讀同一間幼稚園，佢傳授好多揀學校同湊仔嘅意見畀我。」

東網網站 : https://on.cc/東網Facebook專頁 : https://www.facebook.com/onccnews/