張敬軒對吳博君離世感遺憾 回應英皇財政狀况：一啲都唔擔心

張敬軒昨晚（19日）於3號風球下，到澳門酒店泳池演出，以多首歌曲帶動氣氛，更出動私伙水槍與泳客互動，笑言人生當中演唱今次最多人不穿衣，但他拒泳客要求除衫。

張敬軒表示有留意公司財政狀况報道：「公司嘅事都要關心，不過公司內部並冇任何不安或聲音，知道老闆好重視每一間分支公司運作，基本上疫情後，好多公司都要面對唔同挑戰，但老闆係未雨綢繆嘅人，每間公司都好穩健狀態去營運，我哋一啲都唔擔心。」

對於吳博君離世，張敬軒稱有段時間，透過演藝人協會了解前輩狀况，聽到消息感遺憾：「我都有屋企人患漸凍人症，好明白去到某個階段，醫療方法和藥物未必可以幫到，雖然我冇同吳生面對面傾過偈，不過睇過佢訪問，覺得佢係好豁達及相當有智慧嘅前輩，希望鼓勵對方家人繼續勇敢生活，相信佢嘅家人可以慢慢重拾生活步伐，我亦都會通過演藝人協會，睇下有乜嘢可以援助。」

另外，軒仔早前到意大利出席Tyson Yoshi婚禮，他明顯容光煥發，他說：「當然啦！瞓夠10個鐘及氣候好，係差好遠，冇諗過喺當地一落機，第一晚飲完幾杯，連哮喘復發都即刻好番，一聲都冇咳，相信同心情有關，去沾喜氣都好開心，亦學懂要去慢活。」

張敬軒形容Tyson Yoshi與太太Christy的婚禮為沉浸式婚禮，每一環節都好有愛，於婚禮大合照時，他與Serrini坐正中間，被指似「老爺奶奶」，他稱是刻意這樣做，大讚一對新人招呼得好，反而獲一對新人在社交平台留言感激幫忙，他說：「幫乜鬼吖！手板眼見功夫，只係有時唔抵得，覺得有啲事可以做得好啲，一對新人好怕麻煩朋友同家人，有啲唔敢出聲嘅事，我見到就主動幫手。」

軒仔表示於Tyson婚禮上，首日及婚禮早上喊得最多，他說：「因為我要分別為新人對誓詞，聽到就算幾好朋友都唔會知嘅過往，寫得十分感性，Christy嗰段好powerful ，Tyson嗰段好少睇到鐵漢柔情一面。」他對被新郎偷拍放上網有微言：「死嘢，仲要素顏喎！明知我好重偶包，放上網有幾十萬人睇到，仲畀粉絲話我似著到訓導主任咁，嗰套貴嘢嚟㗎！」

張敬軒指看得出Christy在婚禮上花了很多心機，賓客住得好enjoy ，問獲安排入住主人家莊園酒店感覺？他笑道：「所有長者住喺長者樓，每朝瞓醒見到Tyson父母都打招呼，飲杯茶食點心，提前進入退休生活。」

出席完婚禮，軒仔到米蘭度假看最愛家具，他透露訂購了餐枱及餐椅作戰利品：「當獎勵自己，因為真係有2年幾，冇正式出外旅遊，好好放假。」問可考慮過將來退休到外國生活？他則說：「每次外遊無論幾好玩，飛機返到香港一著地，都會覺得在家千日好，暫時呢一刻都覺得退休後以香港為主，可能間中返廣州或到其他城市住下。」

軒仔回港落機翌日便開工，為陳慧琳（Kelly）紅館演唱會擔任嘉賓，張敬軒表示未有見到16歲的蝦餃仔（劉昇），但聽聞蝦餃仔已長得比他更高，他為Kelly任嘉賓心情興奮，「我好多年冇試過咁緊張，近年為其他歌手擔任嘉賓，都冇呢種感覺，唯獨為Sammi（鄭秀文）及Kelly當嘉賓會好緊張，隻手都有少少震，個腦一片空白，因為係前輩，為Kelly演唱會綵排時已很感觸，在台上不禁講life is amazing，冇諗過人生會有一日，能同讀書時期陪伴我長大嘅偶像同台，好不可置信，Kelly對我嚟講，就係電視機上嘅人。」

（即時娛樂）