羅家英投資保障阿姐未來　一生功力無人承繼感遺憾

第4度患癌的羅家英近日受訪時大談身後事，問到有沒有預備遺囑時，他直言最近着手做了很多事：「買咗兩份投資保險同基金保險，寫咗佢（太太汪明荃）個名，仲有我哋排戲嘅地方，樓上十二樓，我都買咗，我話有乜嘢事，呢層樓係你嘅！」他自言思想傳統，來日百年歸老會傾向土葬：「我已經買咗塊地，（買唔買埋太太嗰份？）買埋！買咗兩幅，買咗成十幾年啦，呢啲好簡單，睇你有冇錢去買！」

羅家英直言夫妻倆對於生死話題並無忌諱，平時亦會討論一下：「我估計，都係我走先過佢，佢身體唔錯，但我想遲過佢走，我可以照顧佢，等佢放心，我唔會要佢啲錢，講明㗎啦！ 」他突然由生死講到錢銀，直言銀錢絕對要分明：「講清楚大家冇芥蒂，女人對錢好重要，啲錢係佢自己辛辛苦苦賺返嚟，佢唔會立亂去洗，亦都唔會將錢使喺我身上，最多買件衫我着吓，大家食飯都要AA制。（間屋係太太嘅，你使唔使交租？）差唔多，交半個床位租。（工人使唔使分清楚？）唔使，我同佢講，我同你結婚，你嫁夫隨夫，你不如按照我生活去做，我照顧你，啱唔啱？我包晒！但依家唔係，係我入贅俾你喎，我去你屋企住，你要你咁嘅生活，要咁嘅包裝，我冇能力，亦都話唔想，所以你唔好旨意我負責呢樣嘢！（咁你負責啲咩呢？）俾啲家用囉，梗係有5位數字，掂唔到6位。咁佢又ok呀，每個月過數俾佢嘅助手！」又大爆太太平時喜歡做家事：「鍾意抹枱、執嘢、搬花盆，將啲櫈搬上搬落，（咁你有工人㗎嘛？）佢咪叫工人做，但你唔好旨意你做嘅嘢叫我做，no！我喺屋企係休息嘅，你唔好理我撻喺邊度，小小地方我就瞓得㗎啦，所以依家我有間屋做後備，喺廣播道，隨時嗌交就去住啦！」問到太太何事會辣着他？他猶有餘怒地說：「我真係嬲！揸車千祈唔好俾個女人坐你隔籬，叫你行呢度、行嗰度，唔准轉彎、唔准咩，幾煩，最好佢瞇埋對眼，遮住瞓覺！」

而面對未來珍貴的8、9年，他渴望過着隨心所欲、自由自在的日子，至於可有遺憾，想趁這個時候彌補？ 他坦言：「唔要求，我冇遺憾，我樣樣嘢都想做，樣樣嘢都做唔到，不如唔好做，做到就做，做唔到就算數，唔好逼自己！（冇小朋友係唔係一個遺憾？）小小遺憾，但係有好有唔好，因為冇仔女，你就冇後顧之憂，最多就係我嘅一生功力——做大戲，我冇一個後人承繼，雖然有徒弟，但唔係有血緣！」

東網網站 : https://on.cc/東網Facebook專頁 : https://www.facebook.com/onccnews/