東方日報C1：葉蒨文關嘉敏瞄準樂壇　組「雷神」開騷發圍

無綫女神葉蒨文、關嘉敏、羅毓儀及李芷晴去年憑戀綜人氣急升，4人望新一年繼續長撈長有，愈撈愈起，除個人發展外，又有意組成女團「雷神」，揚言新一年首個目標是合辦粉絲聚會，「馬」上開騷！

無綫戀綜《女神配對計劃》4位女神葉蒨文（Sophie）、關嘉敏（Carman）、羅毓儀（Yuki）與李芷晴相約食賀年飯，大歎好意頭菜式，當中包括鮑魚撈起，寓意馬年包保撈得起！

回顧蛇年難忘事，愛情與事業大豐收的Sophie句句不離男友曾展望（GM），她說：「GM囉！成件事好大衝擊，我一直好嚮往愛情，所以蛇年最大收穫係GM，係突如其來嘅美好，當然仲收穫咗好多工作同粉絲啦！（仲得咗飛躍獎？）攞獎我反而睇得比較淡，唔會大喜大悲。」

羅毓儀情場豐收

同有愛情滋潤的Yuki也認同：「最開心係收穫Kris（林俊其），可以同佢喺事業上一齊奮鬥。」而Carman與芷晴雖未能在節目配對成功，但也非常感恩，Carman說：「蛇年係我嘅進步及收穫年，試咗好多唔同嘢，包括內地短劇、內地綜藝同直播選秀騷，有好多第一次，係學得最多嘢嘅一年。」芷晴亦自覺幸運，透過節目讓更多人認識。

談及馬年展望，4人工作上各有盤算，Sophie笑指真人騷是其戰場，望再參與真人騷及涉獵短劇、獻唱劇集主題曲等不同範疇；Carman望挑戰舞台劇、音樂劇及電影，繼續成就解鎖；Yuki則想拍旅遊節目；芷晴想嘗試不同角色。除了單飛發展，她們又忽發奇想，有意組成4人組合並即興取名「雷神」，霸氣十足！她們說：「我哋相處咗咁耐，已經好有默契。」又笑指第一首歌可以叫《避免踩雷》，其後正經表示4人都有意搞粉絲聚會答謝支持，故不妨合辦，Carman更許下承諾：「我哋馬年第一個目標係女神們一齊搞聚會，馬上開騷！」

李芷晴拒「相睇」

問到兩位單身盛女新一年是否想有新戀情？Carman與芷晴採取隨緣態度，但Carman直言家人有施壓：「經常問啲男仔仲有冇聯絡。（你抗壓力如何？）我最叻左耳入右耳出，佢哋有時講笑話安排相睇，邊個嘅仔幾好，我話『唔好搞咁多嘢啦』！」芷晴父親亦藉口叫她參加公司派對，實則想向她介紹異性，但她拒絕出席。

至於Sophie與Yuki透露與男友互訪拜年，Yuki說：「親戚喺我拍節目時已經不停問我媽咪係咪真，對Kris好有興趣。我有啲緊張，怕佢講錯嘢，佢一緊張就有少少跳掣，雖然好可愛，但我會倒抽一口涼氣。」Sophie則慶幸親戚不多，免卻很多麻煩，加上雙方家長很Chill，不會催婚。

更多新聞，請瀏覽東方日報網頁：

https://orientaldaily.on.cc

東網網站 : https://on.cc/東網Facebook專頁 : https://www.facebook.com/onccnews/