《金童》影評　沉重社會氣氛下打出漂亮的票房賽

《金童》幾經波折下，日前終於上映，仲獲得唔少讚賞。我睇完都覺得非常唔錯，希望大家趁檔期尾聲，快啲入場欣賞！
（以下有劇透）

「一刻粉身碎骨未能止痛一刻千瘡百孔淚流不住難看通一刻風吹雨打逆流洶湧」

故事唔算太複雜，由開初交代張力背景，同兒子相認，一步步建立父子關係，到中間遇上挫折而想放棄所有，再因為方圓而重新踏上擂台。起承轉合清晰，節奏快，零拖戲，由頭到尾都無一刻悶場，劇情去得快又緊湊，但出到嚟感覺依然完整。

電影對白相當精警，唔會太累贅，仲有啲搞笑位。道理位由小朋友口中講出，說教味無咁重，仲幾得意。

「當世道未明視線逐漸變濛我會於你所渴想最光遠方處幫你」

雖然整套戲主要得兩場拳，但拍得夠精彩又逼真。最尾場拳阿聰堅定嘅眼神同表情，令我非常深刻，加上慢鏡，全場觀眾同佢一齊屏息呼吸，一齊捱每一拳，彷似感受到佢嘅痛楚，到最後等到機會，打出致勝一擊，實在太熱血同感動。

從阿聰全身嘅肌肉線條，到打拳動作，每滴汗都代表佢下過嘅苦功，慶幸依部電影最終能面世，比大家睇到佢努力嘅成果。

「知很不安想要被救起懇請講給我聽共同踏破絕地」

無可否認，《金童》拍攝上確實有年代感，運鏡同調色係有少少老套同電視台feel，而劇情驚喜亦唔算多，但可以睇返當年嘅阿聰，未長高嘅皓嵐，仲有當時嘅香港，係別有一番風味。就算《金童》稱唔上一套神級作品，但絕對係值得入場睇嘅電影。

「今天你能渡過的別要被嚇怕遊過低窪面對風沙別忘我在旁同撐起回家」

港產片用拳擊做主題嘅電影唔少，由早期少少嘅《激戰》，到近年《一秒拳王》、《臨時決鬥》，可以話各有特色，質素相當唔錯。《金童》亦唔例外，成功靠口碑越戰越勇，喺今年淡靜嘅市場，以及最近沉重嘅社會氣氛下，打出一場漂亮嘅票房賽。

感謝阿聰戲內戲外嘅付出，令我地可以睇到一套咁出色嘅港產片🥊

「你是美好的昨日就算極暗」

最後，如果你正面對低潮，緊記只要繼續堅持向前，你定可以撐到最後💪🏻

娛樂