劉德華再度現身舞台劇謝幕　預告重演：book到場就再嚟

由朱栢康、魯文傑、麥沛東、芯駖@COLLAR、巢嘉倫、黎逸正等主演，朱栢謙、張志敏執導的舞台劇《你好，打劫！Reunion》12場演出昨日（5月18日）圓滿閉幕，出品人劉德華在昨午尾場再度現身，與劇中主角一起謝幕：「我哋呢班人喺適當嘅時候會對着你哋荷包講：「你好……打劫！」，似是暗示隨時再度公演。完場後華仔逐一跟每一位演員和導演擁抱，感謝大家落力演出。

完成12場演出後，大家嫌未夠喉，劉德華有感難得遇上一個好劇本，希望將這個劇目成為經典，一直公演下去：「只要book到場就再嚟㗎啦，你哋邊個得閒就嚟埋位！」首次參演舞台劇的芯駖，感謝一班隊員對她這新手的包容和鼓勵，讓她獲益良多；當大家都以為她完成12場演出後會有一刻感動落淚，因她的角色設定，每一場都要情感大爆發而嚎哭，但她完場後卻整個人鬆弛下來。她笑說：「因為演出最後一幕嘅時候已經哭乾晒眼淚。開場前反而想喊，因為12場咁快就完咗，好唔捨得。自己第一次參演舞台劇，可以遇上一班咁好嘅班底，非常難得！」

至於連續12晚掌摑芯駖的麥沛東可會覺得心痛？他不好意思的說：「其實係掌摑咗13巴；其中一晚連刮兩巴！唔單止心痛，而且仲好驚。有朋友問我會否擔心收到fans𠝹刀？因為掌摑天團偶像！但心駖演嗰場戲感情澎湃，我都要情緒爆發，忍唔住要掌摑佢。我曾經同導演講不如由芯駖掌摑我，因為我塊面大啲安全啲，發生意外機會率會低啲，始終掌摑會有頭暈嘅風險，加上芯駖塊面又骨又瘦，但導演堅持芯駖被掌摑嘅效果同感覺會好啲。」而心駖亦感謝麥東打她的力度剛好，兩人互動下，讓她順利完成這幕激情的演出。

至於好一陣子沒有演出舞台劇的朱栢康也感激遇上這一班好對手，讓他大過戲癮的說：「隔咗咁耐再返舞台，今次遇上呢班志同道合嘅對手，大家唔單止可以一拍即合，令到我有再次享受舞台演出嘅感覺，好正！」而在劇中演出甚有喜感的魯文傑，自爆導演朱栢謙發現有網民留言認錯留了長髮的他是劉雅麗，令他哭笑不得的說：「哇！以為我係劉雅麗？我真係入咗腦，演出嘅時候真係有一刻俾「劉雅麗」呢三個字影響到，好彩我撥一撥頭髮，好快清醒過嚟！其實我由冇乜頭髮可以留到而家咁長頭髮，真係覺得好開心㗎！」而繼早前重遇張家輝之後，昨日尾場跟曾經合作過舞台劇的兩位舊拍檔錢嘉樂、湯盈盈敘舊。「湯盈盈係我演舞台劇嘅第一個女主角對手，錢嘉樂曾經同我合演過《王老虎搶親》，難得喺後台見到佢哋份外親切，今次喺後台真係有好多回憶殺。」

至於3度參演這個劇的黎逸正（飾銀行見習生）和巢嘉倫（飾資深銀行職員）也異口同聲表示，雖然是同一個劇，但今次幕後班底和加入新演員，令他們演得更過癮，每場對他們來說都是一個挑戰，一次比一次更有滿足感，個人表現發揮更大。巢嘉倫今次更多了一個別號「鬍鬚佬」；因為第一日入組導演便要求他留鬍鬚，讓他角色感覺上多一份新鮮感。而劇中他多次說「小明的故事」，給觀眾留下深刻印象，讓人會心微笑，不少fans留言提起小明的故事便想起「鬍鬚佬」。

此外，兩位導演朱栢謙和張志敏十分欣賞原著編劇導演饒曉志這部作品，張導坦言要將中港兩地文化背景故事融合讓觀眾理解，對他們來說是一個挑戰。而兩人也高度讚揚首次演舞台劇的心駖，雖然一切由零開始，但她很努力。朱導更爆排練的中段，芯駖因壓力大出現脂肪量和肌肉量體重驟減狀況，令人心痛，但她為了有更好的演出在所不計，故讓團隊更愛惜這位成員。

而昨晚到場的嘉賓陳家樂、連詩雅、錢嘉樂、湯盈盈、劉天蘭、Day@COLLAR、駱振偉等，大家不約而同讚嘆2小時無間斷的精彩演出節奏明快，期待重演再次捧場。陳家樂尤其欣賞導演設計上巧妙安排，除了舞台上所見，其中有演員更聲演多個角色，最後得知6個演員原來扮演了9個角色，台上演員的互動，讓他大開眼界。