正東舊同事驚喜現身 陳慧琳感動落淚 謝安琪爆Kelly入得廚房出得舞台

《陳慧琳Season 2萬人結界演唱會》昨晚（25日）迎來第8場演出。連日來，Kelly（陳慧琳）雖然多次感觸眼紅，尤其是感謝雷頌德（Mark）特意從英國帶同家人回來支持，但她努力控制情緒，以免影響演出。

昨晚唱到《最佳位置》時，當舞台天橋升起，Kelly突然發現當年正東唱片一班舊同事坐在台下支持，終於忍不住淚水並哽咽道：「哎呀！啲舊同事，見到你哋又喊…冇你哋就冇呢隻歌，多謝晒！我哋一齊打拼返嚟，你哋突然出現，殺我一個措手不及。」隨後全場觀眾大合唱，場面感人。

緊接《最佳位置》後是嘉賓環節，Kelly抹去淚水，笑言要收拾心情，因為登場的嘉賓與她合唱一首自己非常喜歡的歌。音樂響起《囍帖街》時，全場歡呼，昨晚嘉賓正是謝安琪（Kay）。2人曾多次合作，Kay最難忘與Kelly在環球10周年演唱會上跳唱，她笑說：「嗰次我真係明白，唱跳係需要天分，Kelly好簡單就跳完唱完，我就跟得好辛苦。」

Kay爆出多年前在一次節目錄影中，意外發現Kelly廚藝天賦：「當時要煮海鮮，仲要處理隻蟹，係好生猛，我哋要劏蟹。點知Kelly好熟手，仲教我點開邊！我當時好驚訝，同同事講『以為Kelly唔入廚房』，點知佢哋話：『你畀把刀佢，佢連成隻雞都識斬！』」

2人從唱歌、跳舞到「煮飯仔」都合作過，Kelly即興提議：「不如我哋搵鍾珍開部戲，叫埋你老公，拍套笑片《殺夫記》，我劏雞咁叻，啱晒！」笑爆全場！Kay繼而在Kelly換衫時，遊走兩邊唱出《3/8》。

因颱風影響，原定7月20日的場次，延至明晚（27日）舉行。為配合颱風主題，Kelly特別獻唱《風眼》。她與Super band成員談到颱風時，透露當日一直盼望下午4點前，改掛三號風球，可惜事與願違。Mark笑說：「通常演唱會改期，歌迷會鬧爆，但Kelly嘅Fans反而好開心，因為原本買尾場飛嘅人，𠵱家變成真尾場！」Kelly笑說：「天意呀！希望唔好再改期，多謝夏韶聲讓咗啲時間畀我哋！」

Mark、單立文與Joey Tang搞笑提議，若再受颱風影響，就來個《萬人空櫈結界演唱會》——夏韶聲唱《花花宇宙》，Kelly唱《空櫈》。Kelly即場模仿夏紹聲磁性低音演繹《空櫈》，Joey Tang則以超低音唱《花花宇宙》。

（即時娛樂）