【名校】為幫小學兒子搏入名校 年年叩門轉校兼搬屋
本地港媽主張「贏在起跑線」，無非想子女能入讀名校，順利升上大學，平步青雲。有網民見朋友為兒子多次叩門轉校，為搏入名校不惜搬屋，不禁想知道：「讀名校真係勁啲咩？」
Photo from 劇照《理想國》
為讀名校不停轉校
一名網民在「香港討論區」發帖：「讀名校真係勁啲咩？」，她指朋友有一名讀小學三年級的兒子，為搏入名校，小朋友已轉了兩次學校。「原因係話想仔女讀好啲，佢小朋友讀嘅本身就係好普通嘅學校，之後朋友每一年都有幫佢個仔叩門。終於畀佢轉咗去間地區名校，以為朋友唔會再去叩門啦，點知佢都仲繼續幫小朋友周圍叩門，話因為而家果間冇一條龍。佢想個仔可以讀間一條龍嘅名校，咁到時升中又唔洗煩。佢仲計劃埋搬屋，諗住搬去名校校網區。」
見朋友勞師動眾，事主實在不明白，指「讀名校真係咁有必要咩？小朋友係咁轉校又會難適應啲，每轉一次校，校服果啲又要再買，要使嘅錢又多咗。為咗仔女讀好啲，有必要幾年轉一次校咩？讀名校又代表到啲咩？小朋友聰明勤力嘅話，讀咩都一樣啫？」
名校有讀書氣氛
不少網民為此提出意見，當中不少人認同入讀名校有不少優勢，有網友指出，學習氣氛很重要，在名校每個小朋友都努力讀書，自然近朱者赤。若有學習上的問題，隨時可以詢問同學。「同啲背景好嘅小朋友一同成長點都有着數㗎」、「受學習氣氛影響，會有良好嘅帶動」、「真心勁啲，無論心態及學習思維」、「學生嘅讀書氣氛會好啲，少啲機會去學壞」。
Photo from 《皮諾丘》劇照
亦有人指讀名校是「為咗日後人脈好啲」、「名校就係要識一班富貴同學，第時出身就知有咩分別，個個有家底有背景，人脈關係是識人好過識字」。
較大機率入神科
有家長分享子女入讀名校，將來入讀神科的機率也較大。「當年我對仔女升中入到名校，真係開心咗幾個月。細女更入咗間頂級女校，佢靠運動出色，學業中等，好在中六個年發力，DSE成績好到入到神科。而佢學校個年有幾十位中六同學入咗兩大醫科，另外數十人讀法律，一般中學很難有咁嘅成績」。
Photo from 《學校2021》劇照
網民：名校小學個班勁過普通小學一條街
帖文亦引來名校學生回覆：「我個人經驗就肯定係，中一時名校小學個班勁過普通小學一條街」，他指不少畢業於名牌小學的同學，家庭十分富有，媽媽、工人和司機坐勞斯萊斯接送上學。不過，升至中五、六後，那些成績勁的學生冇晒影，「唔係去咗中下游就去咗外國」。
不過亦有人持相反意見：「其實冇咩分別，你到出嚟做嘢冇人會care你咩中小學出嚟，就算大學都係，除咗fresh grad第一份工，人脈就睇個人性格同際遇」。
Text：Mami Editorial
Source：香港討論區