《存酒人》觀後感　小說改編高質劇集

由小說改編，一連十五集嘅《存酒人》正式完結，係一套特別又高質嘅劇集，我非常喜歡，未睇嘅快啲去追返！
（以下有劇透）

劇集由還酒展開，每集揭開存酒人背後嘅心事。每個單元唔算長，但起承轉合寫得完整，帶出各樣情感，有唔少都令我印象深刻。好似《朋友一場》舞台劇式嘅張力，《乾邑》寫實中帶點傷感無奈，《江湖》拍出舊港產片味道，《龍舌蘭》連西部牛仔嘅動作場面都拍埋。

每集好似睇緊一部微電影，最正係卡士超有驚喜，每晚開盲盒咁，刺激又興奮，仲要大家都演得出色。結局當燁仔講返三個月嘅經歷，加上朱謙嘅淚水，再揭開最後一枝酒嘅主人，我都湧出一份莫名嘅感動。

劇集節奏唔快，色調陰暗，加上好多時喺晚上取景，營造出一份淡淡嘅憂愁，拍得好有味道。配樂亦係世界級，仲做咗唔少新歌，主題曲搵Amy Lo主唱亦係神來之筆，完全係喺酒吧會聽到嘅風格，將劇集情感再昇華。

眾多角色中，阿當描寫得最立體。雖然佢表面花天酒地，玩世不恭，但歡笑背後嘅創傷卻係大到難以形容，甚至無法建立一段長久嘅關係。

點解佢最終選擇離開？或者無一個明確答案，但觀眾由開初零碎地認識阿當，及後知道佢離世，再喺台灣拼湊出完整嘅佢。你會感受到佢嘅空虛脆弱，感受到佢有無法解開嘅心結，感受到佢搵唔到自己嘅價值，嗰份沉重與心酸會令你明白依個決定。

Lokman由外形到演繹完全同角色融合，實在太犀利，同劇中幾位異性一樣，你會比佢嘅魅力吸引，再次證明Lokman係一位優秀又全能嘅演員。

而燁仔係連繫所有故事嘅中心，同阿當嘅兄弟情簡單動人，一切盡在心中。同阿雪一段情看似無咩問題，其實彼此一啲都唔親密，甚至喺最需要對方嘅時候都唔喺身旁，最終淡然地分別。燁仔喺見證不同故事，再經歷失去後有所成長，甚至同自己嘅過去和解，每步帶著淚與痛，連背影都彷似變得成熟。

今次係Tiger首度擔正，真係毫不失禮，睇到佢嘅從容，希望未來會多啲喺銀幕見到佢！

其實人生旅途遇上嘅人都不過係過客，我地孤身而來，亦定必孤身而去。縱然彼此嘅故事會完結，但留喺腦海嘅感受同回憶係永遠唔會消失。我地或者無法控制人生嘅長短與經歷，但可以珍惜把酒當歌嘅當下，珍惜與你深夜暢談嘅對象，好好生活。

最後，感謝ViuTV同台前幕後拍出一套咁有質感嘅劇集，為觀眾喺寒冬中帶嚟一點溫暖。

娛樂