【中梵關係】嘆協議係「整個教會嘅悲劇」 專訪陳日君：自己救自己

中梵秘密簽訂主教任命協議，在此議題上一而再與教廷「唱好派」打對台的天主教香港教區榮休主教陳日君樞機怒斥做法醜陋，「又話暫時性，又話唔公佈，點解秘密嘅唧？即係唔見得人架囉，即係自己都覺得唔啱囉。咁嘅條件下成功咗，為整個教會都係悲劇。」他深信大陸管治教會的方式會席捲香港，屆時香港教友隨時要加入愛國會，教會學校未必能談信仰，「將來好多都要靠教友（堅持）架喇」

記者 張嘉雯

陳日君去年到訪東歐，了解昔日教會如何應對共產政權，發現當時教廷和匈牙利政府簽訂的秘密協議包含驚人條文－－若教會內有人批評政府，當局會把名單交給教廷，由教廷跟進處理，「宜家（同北京）簽啲秘密協議，係咪又係類似嘅嘢？」

對於盛傳日後任命主教會先經當地教會互選投票，再把人選交給教宗批示，他認為做法比現在每次任命時雙方暗裏角力更壞，「民主投票？民主咪即係佢獨立自辦囉，教宗每次都否決，率之都係會投降架，你夠膽否決10個咩？有時表面上睇嚟好似無傷害，但決定性嘅權利係畀咗政府。」

在協議下，雙方需互認對方的主教，包括北京接納30名梵方承認的地下主教，「畀佢入（中國官方）主教團，好似好大嘅恩惠喎，即係逼佢入鳥籠裏面呀！地下啲人好驚，你以為佢（北京）點解同你簽呀，因為想用梵蒂岡嚟消滅地下教會呀。」

他相信中共極有可能要求地下主教轉任沒有繼承權的輔理主教，再另外委任「自己人」任正權主教，「教會就係咁，要趕走一個人，畀佢升級，其實係假升級，搶咗你個位，然後承認你係榮休主教囉。」他指去年底被要求讓位的汕頭莊建堅主教仍有向他求助，他有再去信羅馬，希望信件可以順利送達教宗的手。

至於梵方要承認的7個非法主教，部份傳聞已婚或有子女，向教廷認錯求寬恕，陳日君對此氣憤難平，「話佢哋承認自己錯咗，唔係政府准許佢哋可以認錯架咩？政府叫你認你咪認囉。」

他直言在上述條件下簽協議等同教會投降，「最可笑係話簽咗等於（北京）承認教宗係教會嘅領袖，我哋要佢承認架咩？要跪喺習近平面前要佢承認你係教宗？」身為教會一員，他對教廷的態度感慚愧，深信教會的國際地位亦會被動搖，「將來共產黨倒台喇，你哋天主教企開啲，建立新中國，你哋同共產黨一齊，無你哋份！」

陳日君相信，隨著協議簽訂，內地管治教會一套很快殺到香港，至於日後香港主教任命需否請示中共、香港教區會否加入愛國會，他如此回應，「大陸啲嘢會搬嚟呢度架喇，無乜出奇架喇，將來好多都要靠教友（堅持）架喇，我哋就睇唔到架喇，我哋冇眼睇架喇」。

「全個香港同大陸都差唔多架喇，教會會例外架咩？林鄭講宗教，你以為佢疏忽講錯？佢係有計劃咁講架。」陳日君自己會入愛國會嗎？「好似上海金（魯賢）主教咁，佢話自己老喇，都唔會迫佢加入嘅，我唔出聲夠㗎喇，我老喇（記者：你就老啫，咁香港仲有其他主教架嘛？）86歲仲唔夠老呀？咁唔關我事喇，我唔係救世主，等佢哋自己救自己囉。」

整體香港的言論空間，他相信會繼續收窄，「冇得講㗎喇，尤其嗰啲靠政府食飯，靠教會食飯嘅，又更加會麻煩啲。」而學校的情況就更難想像，教會學校的學生也未必能接觸信仰，「好快有大問題架喇，而家已經唔係我哋辦學，係政府辦學，喺大陸唔係我哋辦教，係政府辦教」。

他鼓勵教友盡力而為，堅持信仰，「文化大革命，信仰都保存啦，所以我哋唔好睇眼前，我哋睇遠啲，我哋唔係救世主，做咗可以做嘅嘢就得，唔怕唔怕，我哋喺天主手中」。

陳日君晚上在個人網誌再撰文批評中梵協議，質疑教廷要求教友盲從秘密協議內容，猶如「死屍一樣服從」。