【唔捱得】張達明呼籲監製畀佢做皇帝

藝人張達明接受苑瓊丹（苑仔）邀請為香港開電視節目《開工大吉77》任嘉賓，入行多年的他，近年一嘗得獎的滋味，更曾經不相信自己獲獎：「兩年前去華鼎獎，初時以為係做頒獎嘉賓，到場先知自己攞獎，初時都唔信㗎，以為佢哋拍整蠱片，嗰次就第一次攞獎。到金像獎被認同意義好大，原來我係一個正式嘅演員，係交到貨嘅！當時好耐冇拍戲，可以參演係好吸引，我擔心自己身體做唔做到，當時真係好瘦，不過動作戲唔多，覺得自己可以應付到。」

他坦言未完全康復，但盡量「包裝」自己見人：「好似今日要見苑仔，我咪化個妝，食番肥啲睇落飽滿啲。依家我都呼籲各大監製搵我演皇帝呢類角色，坐喺度等人服侍，加上我做過周星馳電影嘅皇帝，所以係『皇帝專業戶』。」

談到早年因為工作離鄉別井，所以對家人有所愧疚：「梗係會啦，未病之前都有啦！當時去廣州拍戲，一走就要走半年，間唔中先返香港一日半日，離開仔女咁耐都有啲心痛。我嘅仔女對我好重要，係我人生最美麗嘅事，我係幸運兒，我會做所有嘅事令佢哋快樂。」

東網網站 : https://on.cc/

東網Facebook專頁 : https://www.facebook.com/onccnews/