暗病入院輸足2袋血！陳觀泰：冇睇醫生可能我走咗

武打影星陳觀泰為電影拜神，透露近年由北京搬到中山「隱居」，今次之所以出山拍戲，他表示：「電影老闆好懷念以前動作片，所以搵盡方法搵我，套戲都係講上咗年紀嘅過氣武打演員。（拍打戲辛唔辛苦？）唔辛苦，食菜咁，以前辛苦啲，依家拍攝器材進步咗。」講到佢身形甚fit，他透露靠游泳保健，又自爆去年初患病：「其實我係增肥咗20磅，因為有輪我變咗素食，但搞到營養不足，有啲無形嘅暗病，瘦咗好多，睇醫生就發覺原來自己紅血球同埋白血球失衡，入醫院輸咗2袋血，之後食番正常嘢，所以唔好刻意改變飲食。」

問到太太可有陪同來港拍戲？他表示：「冇呀，因為隔離煩，我可以照顧自己。（咁你幾時返番上去？）嚟緊我可能要拍亞視嘅劇集，但我又要返上去打針同食藥，所以可能會返去隔離完再落返嚟。」另外，講到曾合作的王鍾去世，他表示：「有啲遺憾，但避免唔到，人嘅生活長短係上天注定，如果我上年冇睇醫生可能我都走咗。」

東網網站 : https://on.cc/

東網Facebook專頁 : https://www.facebook.com/onccnews/